Dignidat i derechi igual pa un i tur. No t’esei mester ta nos ambishon?

Bo antepasadonan algun dékada atras tabatin relashon seksual ku bestia? Nan tabata kanibal, esta kome karni di hende? Ta presisamente esaki a bisa un siglo pasá ku lo pasa si duna hende pretu i hende muhé na Kòrsou derechi igual di voto ku solamente hende hòmber blanku tabatin. J.J. Hamelberg i Frater Radulphus tabata liderá e kampaña seksista i rasista askeroso aki. E strategia tabata bisto: spanta hende ku koi kèns pa no akseptá derechi igual di un i tur. Danki na hende ku kurashi ku a lucha pa derechi di voto universal, awe na urnanan no ta relevante mas si bo ta muhé òf pretu. E lucha tabata difísil, pero hustisia a triumfá riba maldat.

Awe, representantenan di e mesun gruponan ku no tabatin derechi a konsekuensia di nan sekso i koló, ta grita i oponé kontra di derechi igual di LGBTQ pa motibu di preferensia seksual. E mesun grupo ku ta gosa di nan derechi di voto danki na luchadónan den pasado, awe ta ninga otronan di gosa di derechi igual.

Ki diferensia tin entre e rasistanan di siglo pasá i abo ku ta kontra pa e grupo LGBTQ tin derechi igual? Ki diferensia tin entre nan ku a yama hende pretu kanibal ku set pa sèks ku animal i abo ku ta bisa ku derechi igual pa LGBTQ lo kondusí na pedofelia i matrimonio entre hende i mata? Ken bo ta pa skupi odio tokante di supuesto pedofelia ora LGBTQ kasa, mientras abo ta bira kara kobardemente ora pastornan pedofil i ‘gay’ habusá di mucha? Awor ta kuestioná si e hues ta bon na kabes i ke ‘investigá’ si e ta ‘gay’. Manera e habuzadónan den pasado, na ta diskutí e esensia, esta derechi humano pa tur hende irespeksto koló, sekso i preferensia seksual.

Derechi igual pa LGBTQ ta bira un realidat mas lihé ku nos ta kere. Awor, nos por para na e banda korekto di historia i akselerá esaki den nòmber di dignidat i derechi igual. Igualmente nos por oponé, kalumniá, i plama i odio atrobe riba Alameda i laga historia husga nos meskos ku esnan ku a sostené sklabitu i habusu basá riba koló, religion i sekso.

Willemstad, Kòrsou