Pastornan kristian ta sigi krea odio den nos komunidat kontra di LGBTQ. Komo si fuera no ta sufisiente ku nan ta prediká venenu den nan misanan, kada biaha mas tantu, sin ningun sorto di bèrgwensa nan ta sali den publisidat ku nan repudio kontra di un minoria di nos suidadanonan. Algun aña pasá tabata den Alameda ora e radikalnan aki, akompañá pa Obispu, a manifestá kontra di personanan di LGBTQ. E aña aki nan a kuestioná estado mental di e hues ku a disidí na fabor di derechinan igual di LGBTQ manera ankrá den nos Konstitushon. Awor nan ta pone na duda e pilá mas stabil den nos sistema demokrátiko, esta e poder hudisial.
Klaro ku no ta promé biaha ku pastornan ta kere ku nan manera di pensa ta riba nos konstitushon. Algun dékada atras nan a sapatiá kontra derechi pa hende pretu i derechi di hende muhé. Ta un historial bergonsoso nan tin tras di lomba.
Awor aki nan ta sinti nan empoderá pa diskriminá un grupo den minoria. Empoderá pa algun partido polítiko ku a risibí nan plaka pa kampaña. Empoderashon prinsipalmente pa e silensio di un grupo muchu grandi di hende.
Mientras tantu e pastornan kristian aki ta preferá sera wowo pa e abuzonan ku sistemátikamente nan ta perpetuá, manera abuso seksual kontra di menornan i ta skohe pa pinta un minoria skur ku nan idioma ekstremista.
Pa kolmo, ami i abo su plaka di belasting tur aña (mas o ménos Ang 1 mión segun nos presupuesto kapítulo Bestuur, Planning en Dienstverlening) ta bai pa sostené entre otro e pastornan radikal aki. Ta bon pa menshoná ku histórikamente Gobièrnu a sostené iglesianan ku supsidio pa nan hasi trabou di formashon den bario, speshalmente tempu ku den kunuku (distrito 3 i 2) servisionan di edukashon di Gobièrnu no tabata yega. Parse ku e pastornan aki ta mira nan tarea pa venená ku nan retórika vil. Ta tempu pa nos plaka di belasting stòp di finansiá tur e misanan radikal aki.
Cody, Wyoming
Alex David Rosaria Blog 
E unikonan ku si ta risibi esaki ta iglesia katoliko. No generalisa tur e denominashonnan, paso nos TA stima tur homo, hetero, lesbiananan, nan tambe ta kreashon di Dios i Dios ta stima nan. Loke Dios ta odia ta nan echonan, sino Dios mes no a kaba ku Sodoma i Gomora i asina nos por lesa atrabes di Su palabra muchu mas di esaki. Ami ta stima tur i mi ta hasi orashon pa tur. Hopi di nan ta mi amigunan ku mi a kore bon kaya ku nan den pasado den mi mundu di modelahe i reina di beyesa. Si mi sa ku awendia diferente a komberti na Dios i ta sirbi’E fielmente. Ta Dios SO por kambia tur hende, loke nos tarea ta, pa hasi orashon pa e kondishon i situashon aki i laga Dios mes obra den nan.
LikeLike
Ami sinseramente no por komprondé pakiko ta subsidiá e tiponan aki. Nan ta bira multi mionario riba kustia di e hende humilde. Pa kolmo nan no ta paga un depchi na belasting. Anto ta subsidiánan? Simplemente inkreibel.
LikeLike