55 aña morto di Dòktor: tempu pa konta su historia personal

Manera ta e kaso tur kaminda, ta nesesario iluminá diferente aspekto di éroenan nashonal. Den e kaso spesífiko aki, Moises Frumencio da Costa Gomez (Dòktor). Hasiendo esaki bo ta hasi e éroe mas humano.

Riba 22 novèmber 2021 nos ta konmemorá 55 aña ku Dòktor a muri. Manera kusturber lo enfatisá su logronan polítiko den diskursonan.

Na selebrashon di 100 aña Dòktor na 2007 ami ku mi ekipo di Fundashon mr. dr. M.F. da Costa Gomez a hinka un eksposishon den otro na Landhuis Groot Santa Martha, i a sòru pa trese algun aspekto personal di su bida dilanti. Detayenan manera ku e a nase ku fam Bikker, tabata kolekshoná piedra di koló, tabata un konosedó di materia pa loke ta trata kachó i tabata gusta studia streya ku su teleskop. Nos a ripará ku e parti aki di e eksposishon a generá hopi atenshon.

Un aspekto di e bida personal di Dòktor ku no a keda eksplorá, ta su periodo na Hulanda komo studiante i abogado, su matrimonio ku Elisabeth (Lies) Heiling (Dfm) ku tambe tabata un hurista briyante, su dos yunan muhé, su estadia na London, entre otro. Kòmbersashonnan den pasado ku famia di Sra. Heiling a mustra un otro bista di nos Tata di Outonomia ku ta bal’e la pena keda tresé dilanti.

Te ainda e aspekto polítiko di Dòktor a keda tratá durante tempu. Mi ta konsiderá ku ta tempu pa un bista kompleto di e hende ku Dòktor tabata i kon esaki a formé komo estadista i a influensiá su vishon pa futuro. Nos tin e derechinan pa hasi esaki (por eskrito) di Sra Lucina da Costa Gomez (dfm) i e plan ta pa pronto pone esaki den formato di un buki.

Si nos ke un mihó konosementu di nos éroe, prinsipalmente pa su legado keda biba serka e próksimo generashonnan, nos mester di un bista amplio di dje i no solamente su aspektonan polítiko.

Willemstad, Kòrsou