Minister di salú a bolbe demostrá di no ta e kuchú di mas skèrpi den Fòrti

Trias politica no ta un palabra manera bergonsosamente e minister di Salubridat a bisa, pero un konsepto ideológiko. Un ideologia basá riba pensamentu di seperashon di poder pa kibra ku e poder total ku e Rei/Reina ántes tabatin na Oropa. Den nos pais ta prinsipalmente Moises Frumencio da Costa Gomez a lucha for di 1935 pa demokrasia basá riba e prinsipionan di trias politica (wak: Het Wetgevendorgaan van Curaçao).

Ku e minister di Salubridat no ta e kuchú di mas skèrpi den Forti, a keda demostrá na numeroso okashon prinsipalmente den kaso di e pandemia di COVID. Sinembargo pa e bisa ku te ku algun dia pasá e no a tende di e ‘palabra’ trias politica, no tin defensa. Ta manera bo tende durante buelo ku bo kapitan bisa ku e ta bai konsultá ku su manual pa wak kon ta baha e avion. Den e kaso tristu aki e minister ni sikiera a saka e manual di kon goberná for di plèstik. Kon nos por kuida i asta fortifiká nos demokrasia/outonomia ku hendenan ku no tin kapasidat pa goberná, ni siera komprondé gobernashon? Te ki dia nos ta keda vota pa e tipo di hendenan aki? Relevante tambe ta e pregunta kon largu mas e otro partido, esta PNP, ta sigi tolerá i guli e tiponan di vupá aki den un silensio sepulkral.

Willemstad, Kòrsou

Advertisement