Colon a kima 50 aña pasá

Djamars lat, kasi mei anochi riba 8 desèmber 1971, sentro komersial Colon tabata na kandela. Un total di 29 tienda ta kima totalmente, pero Colon Supermarket ku tabata un poko mas leu, ta keda di spar. E daño kalkulá tabata Naf 6 mión debí na e echo ku e tiendanan tabata bon surtí den kuadro di benta di fin di aña. Kasi 100 hende ta keda sin trabou. E mesun anochi polis ta detené doño di Center Store, pasombra e a keda señalá den su negoshi te lat i aparentemente e kandela lo a kuminsá den su ‘hardware’. Su siguiente dia mester a lag’é liber pasombra no tabtin indikashon ku ta e a start e kandela. E doñonan di e sentro komersial, W. H. Jolley handelmaatschappij, ku tabata propiedat di religiosonan di e sekta kristian Moravische broeders, a primintí ku Colon lo lanta atrobe.

E sentro komersial tabata situá kaminda tabata e bario Colon. Colon tabata mas bien un refugio pa hendenan ku den siglo 19 tabata hasi e biahe largu di Banda Abou pa stat i vice versa. E hendenan tabata sosegá i pasa anochi bou di algun palu di indju. Despues a lanta algun lots di pieda sin fasilidat higiéniko kaminda un par di shen hende tabata biba, entre otro trahadónan di Klip i Shell ku tabata bin di kunuku. Colon tabata un di e barionan mas pober den nos pais. Pero, Colon tabata semper den moveshon i tabatin hopi bida. Esaki mes a pone ku na 1953 Credit Union Colon, e promé credit union di Kòrsou, a lanta. For di añanan 50, den boka di pueblo tabata bisa: “Colon ta kima” ku tabata nifiká ku kos ta kana i Colon tin bida. Kisas awe lo a bisa “Colon ta sendé”. Pues “Colon ta kima” no tin nada ke ber ku e kandela na 1971. E èkspreshon: “Colon a kima” ku figurativamente kier men ku un situashon a sali foi man, ta hopi usá.

Na aña 1964, 30 òktober,despues di a eliminá tur e lotsnan i ku a ubiká e hendenan den otro bario, sentrokomersial Colon ta habri. Algun di e tiendanan tabata: Colon Color (studio di foto), la Piñata (artíkulo pa fiesta), Colon Petshop, Edward Barbershop, Wayaca (restaurant), Claudia’s Flowershop, Schoenhandel Colon, Sharon (paña pa dama) i Herenmode Colon.

Nunka a kai detenshon pa e kandela aki. Loke si a kousa konsternashon serka nos tabata e hecho ku un dia despues di e kandela na Colon, e agensia di notisia di Hulanda, A.N.P., a pone banda di potrèt di e kandela na Colon, un potrèt di edifisionan na kandela durante di e disturbionan di 30 mei 1969.

Fin di aña 1974, Colon ta habri atrobe, mas grandi, ku mas tienda, mas kupo di trabou i tambe ku mas o ménos 35 bibienda.

Willemstad, Kòrsou

Fuentenan: Archivo Nashonal; Amigoe 9/12/1971

 

Author: alexdavidrosaria

Alex Rosaria is from Curaçao. He has a MBA from University of Iowa. He was Member of Parliament, Minister of Economic Affairs, State Secretary of Finance and United Nations Development Programme Officer in Africa and Central America. He is an independent consultant active in Asia and the Pacific.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

%d bloggers like this: