Nos bisiña Barbados a dal un paso importante den su proseso di emansipashon polítiko. Despues di 55 aña di independensia Barbados ta bira un repúblika. Esaki kier men ku un hende di Barbados ta Hefe di Estado i no e Reina di Reino Uní.
Hopi pais den Karibe ku a logra nan independensia di Gran Britania den pasado a keda mantené e Reina komo Hefe di Estado. Asina aki Barbados ta djòin mas isla Karibense ku ya a kibra ku e monarkia Britániko: Trinidad & Tobago, Guyana i Dominica. Ta premirá ku mas isla/pais den mundu lo sigui e ehèmpel aki manera Jamaica i New Zealand.
Monarkia pa e isla korektamente ta un sistema totalmente anti-demokrátiko. E rason prinsipal ku Barbados a tuma e paso aki ta ku nan a demostrá di a manehá nan independensia na un manera satisfaktorio i ku nan mes mester asumí e responsabilidat di hefe di estado.
Remarkabel ta ku Barbados tabata riba e lista di Nashonnan Uní di paisnan no-independiente (List of former Trust and Non-Self-Governing Territories) te 1966. Nos, foi 1955 kaba no tabata riba e lista aki pasombra nos tabata “asina leu kaba riba kaminda di outonomia” i por a kombensé hefatura di Nashonnan Uní di esaki.
Sinembargo nos no a sa di manehá nos outonomia na drechi i p’esei nos no a sa di kombensé pueblo i krea konfiansa ku nos mes por asumí (mas) responsabilidat. Kòrsou un tempu tabata kana dilanti riba e plano di emansipashon polítiko den Karibe, danki na nos pionero mr. dr. Moises da Costa Gomez.
E sońo di e emasipadó grandi di Barbados, Errol Barrow, a bira realidat. No tabata un milager, pero trabou duru i sakrifisio. “Blood, sweat and tears”, e aktual Promé Minister Mia Amor Mottley a bisami na 2008 na Bridgetown, Barbados. Pabien pueblo di Barbados.
Nos bentaha a evaporá i nos ta “den reverse”. No por ta un sorpresa ku e kara di e busto di Dòktor na Bottelier ta parse mas tristu kada aña.
Willemstad, Kòrsou.
Alex David Rosaria Blog 