Traishon: un èks “rooimeester” ku a bira polítiko ta puñelá Dòktor den lomba pone ku e no a firma Statüt

Traishon den polítika ta komún. Kisas e traishon polítiko mas impaktante den nos historia a tuma lugá algun dia promé ku a firma Statüt riba 15 desèmber 1954. Manera nos lo mira e traishon no a bin di enemigu sino amigu.

Ku outonomia un realidat i un konstitushon nobo, na 1951 nos gobernantenan pa promé biaha a haña responsabilidat ministerial. Dòktor a bira nos promé premier despues di viktoria elektoral riba 21 di desèmber 1950 ku 5 asiento. Na 1954, PNP ta bolbe gana elekshon di Staten di 15 novèmber ku 15,590 voto. Ku un luna pa bai tur kos tabata pinta ku Dòktor lo a seya su obra maestro poniendo su firma bou di Statüt riba 15 desèmber 1954.

Traishon a kambia kurso di historia sinembargo.

Despues di elekshon di 1954 Gobernadó Struycken ta pidi Sr. Yrausquin di PPA (Aruba) riba 20 novèmber 1954 pa forma un gabinete. For di e promé siman di desèmber a bira kla ku lo forma Gabinete Jonckheer (DP Kòrsou), pues lagando PNP afó.

PNP a keda afó pa motibu di bòltumento di su aliado na Boneiru, esta Adelberto Esteban (Shon Bubu) Booi di Partido Progresista. Shon Bubu a disidí di bira lomba pa PNP i djòin ku Lodewijk Daniel Gerharts, su enemigu polítiko na Boneiru pa tene Dòktor afó. Poko despues Booi i Gerharts ta lanta Partido Progresivo Boneriano Uní. E movida aki a sorprende hopi hende ya ku te poko dia promé ku e aliansa aki, Gerharts tabata tilda Booi di ta mucha mandá di Dòktor. Lucina da Costa Gomez (dfm)- e tempu ei asistente di Dòktor – a bisami ku ta PNP a duna Booi sèn pa kampaña.

Booi tabata segun hopi opservadó, e piesa mas swak den Gabinete Jonckheer. Booi tabata “rooimeester” ku mester a sòru pa roinan ta limpi. Despues a a bai traha pa un skol spesial. “Hij heeft zich nooit buiten de Boneriaanse dorpspolitiek bewogen” (Het Vrije Volk 9/12/1954). Apesar di esaki e a bira minister despues di a traishoná Dòktor.

E traishon di Booi a dal Dòktor duru. E mester a mira kon su oponente polítiko, Efrain Jonckheer ta firma Statüt. Lokual sin duda lo a hasi mas doló ta e hecho ku e mesun Jonckheer ku a bandoná sala di e promé Konferensia di Mesa Rondó na 1948 pa prepará Statüt, i bai keha Hulanda na Colombia, tabata prònk ku e Statüt ku Dòktor a traha ariba for di añanan 1930.

Shon Bubu Booi ta bolbe traishoná su amigunan ora ku algun dia promé ku elekshon di 1958, e ta bira lomba pa Gabinete Jonckheer i kore kampaña kontra su kompañeronan di kasi 4 aña.

Willemstad, Kòrsou

Advertisement