Riba 9 di desèmber komunidat internashonal ta para ketu na e konsekuensianan desastroso di korupshon pa bida di hopi mil mion hende na mundu. Korupshon tin komo resultado ku plaka destiná pa ‘e bien común’, ta desaparesé den saku di algun hende. Dia Internashonal Anti-Korupshon su meta prinsipal ta pa konsientisá nos riba e peliger aki i tambe hasi nos konsiente ku kada un di nos tin un ròl den kombatimentu di korupshon.
E aña aki e konmemorashon ta den sombra di kasonan resien di korupshon bou di e élite di nos pais ku (t)a okupá e puestonan di mas haltu den sektor públiko, gobernashon i tambe sektor finansiero internashonal. Ademas, un minister ta manda karta pa para e proseso pa persiguí un grupo ku a hòrta plaka den BZV mientras otro ta insistí pa bira minister apesar di un kondena pa korupshon den pasado.
Asombrosamente ainda nos no a ratifiká United Nations Convention Against Corruption (UNCAC) ku ta pèrkurá pa un infrastruktura pa kombati korupshon. Un kuestionario pa partidonan polítiko na víspera di elekshon ta trese na kla ku mayoria ta bisa di no ta tuma sierto medida kontra korupshon pasombra “nos ta un komunidat chikí”. Es mas, e partido na mando no a ni partisipá na e kuestionario, ni indiká kiko e ta pensa di e tema. Por sierto, e mesun partido a produsí dos (2) minister i dos (2) Parlamentario kondená pa krimen kometé.
Kiko nos ke komo pueblo i votadó? Kisas nos no ta realisá ku si nos keda sostené ku nos voto hendenan ku no ta íntegro nos no por haña gobernashon íntegro? Wak e lista di Transparensia Internashonal i ta bira opvio ku no tin ningun pais/teritorio na mundu unda korupshon ta prevalente mientras e gobernashon ta íntegro. Gobernashon korupto ta e indikaó di mas fuerte ku lo tin korupshon otro kaminda den e komunidat en kuestion.
Den kuadro di e tema e aña aki, esta kiko ta bo ròl den e lucha kontra korupshon: kisas, stòp di vota pa esnan ku tin un ‘trackrecord’ di korupshon.
Willemstad, Kòrsou
Alex David Rosaria Blog 