2021: un aña skur ku tiki lus positivo

Sin duda 2021 tabata un aña skur.

Un epidemia ku a kousa hopi morto i mas deterioro sosio-ekonómiko, mientras un kampaña kriminal di desinformashon, teoria di konspirashon ridíkulo, prinsipalmente riba plataformanan soshal ku e minister di Salubridat konsientemente ta alimentá, ta sigi. Esaki ta bòikotiá bakunashon, krea espasio pa e virus mutua i bira mas peligroso i pone ku tin mas tristesa den famia, pobresa i desempleo.

E riesgo di e efektonan di kambio di klima, manera pèrdidá di diversidat biológiko, seguridat di kuminda, daño na infrastruktura i subida di nivel di awa a keda leu for di agènda di Staten i Fòrti i no ta den Landenpakket Curaçao. Nos mester ta agradesido pa liderazgo di Promé minister di Barbados kende si kontinuamente ta papia na nòmber di Karibe di e tema den foronan internashonal.

E aña tambe a resaltá pa triunfo di poder di plaka riba étika, honestidat i servisio. Ningun kaminda esaki tabata mas bisto ku krímennan ‘di kòl blanku’. Entre otro na Ennia; na Banco Maracaibo; Girobank (pendiente); soborno relashoná ku negosashonnan pa re-aktivá refeneria; kondena di un notario; un kaso den Korte ku ta envolví un otro kantor di notario den uso di Derdengeldenrekening (un kuenta spesial di e kantor di notario riba kua plaka ta keda depositá, pero ku no ta pèrtenesé na e kantor di notario) pa kumpra produktonan luhoso pa hende, i un minister ku ta pone desishon di Korte un banda i ‘pordoná’ ladronnan di Naf 6 mion na BZV. Ademas tabatin vários estafa na empresanan privá ku a preferá di no denunsiá di e krímennan kometé. Gruponan kristian a demostrá nan poder di kapital i finansiá algun partido ku plaka brutu pa avansá nan agènda di odio kontra sièrto minoria.

Forsa di kompra ta keda baha i e klase medio ku ta keda tratá manera buriku di karga, no tin e forsa pa sigi entregá. Klase medio a bira les nouveaux pauvres. Sinembargo, e minister di Ekonomia ta básikamente tira sèrbètè den ‘ring’ i su kolega ta anunsiá un kampaña di spanta hende ku ‘aanslag’ di belasting sin kalkulá e konsekuensianan sosio-ekonómiko. Desesperashon ta kondusí na dekresementu di poblashon (emigrashon e.o) peligrando nos fondonan di penshon i soshal. No ménos importante ta e oumento di kasonan di malestar mental kousá pa angustia i krísis di nervio.

Kisas mas alarmante ta e direkshon di dependensia i limosnero di nos. Un aktitut di hunga víktima, saka man pidi, mas bien èksihí Hulanda plaka. Kontrali na e vishon di nos arkitektonan di demokrasia.

Pero, tabatin algun kos positivo: un yu di tera triunfando ku su ekipo komo kampeon di MLB, trabou di Fundashon Prevenshon, e grupo di hóbennan empresario ku ta dal bai riba propio esfuerso pa trese inovashon, kresementu di sektor di turismo, e ekipo di epidemiólogia i esnan den kuido ku a traha inkansablemente den kuadro di COVID. E puntonan aki ta muchu poko sinembargo pa logra lusa aña 2021.

Willemstad, Kòrsou