Bon paso di MCB den lucha anti-COVID

Apesar di tur atvertensia di èkspertonan sientífiko rònt mundu, un grupo barika yen ta sigi instigá hende pa no bai bakuná. Esaki, sabiendo si tur hende bakuná e virus ta haña ménos anfitrión pa biba, multipliká i mutua den formanan kada biaha mas peligroso. Ku un grupo chikí ta peligrá bida di e gran mayoria ta imoral i hurídikamente inkorekto. Si ami por a skohe entre di libertat personal di un grupo versus bida/salú di un otro grupo, semper lo mi skohe pa bida/salú. Esaki ta kuadra tambe ku mi pensamentu soshal (wak pa ami i mi prohimo) i no e pensamentu liberal/kapitalista (ami so en de rest mag stikken). Ta straño, pero hopi di e antivaxnan ta yama nan mes ‘soshal’ pero, no ta sikiera konsiente di e kontradikshon. Ya, pakiko bo mester ta konsistente, ta riba Facebook bo ta.

COVID no ta kuestion tampoko di haña COVID, krea antikurpa i kla. Dòkternan aki ya a nota un oumento di pashènt di pulmon a base di e konsekuensianan a largo plaso di COVID. Tin un estudio den preparashon pa wak si tambe a konstatá subida di pashènt di kurason. No papia mes di gastunan di salubridat públiko ku ta kresiendo eksponenshalmente i pashèntnan di COVID den hospital ku ta stroba kuido pa otro ku tin un kondishon urgente. Na mi opinion: bo no ta bakuná, bo no ta kere den bakuna, ta subi bo premi pa seguro. Bo no por kere ku bo desishon ta personal pero e konsekuensianan di bo desishon ta sali for di e pòtmòni komun.

Finalmente, un kompliment pa e banko lokal ku a disidí, despues di vários seshon ku e personal, ku tur empleado mester ta sea bakuná, òf mester demostra via di resultado di un tèst, ku e no tin COVID. E banko ta para na banda di moral i hustisia pasombra libertat personal nunka por ta promé ku bienestar di Kòrsou.

Willemstad, Kòrsou