Dia èks Miembro di Staten Cijntje a hasi un komparashon ku e burdugu Nazi, Joseph Mengele, mi a kondená esaki sin basilá ounke e tabata den koalishon. Awe un tata ta ‘protehá’ su yu kontra krítika di un periodista Hulandes den direkshon di su yu ku ta minister Plenipotensiario bisando ku mester tuma e Alemannan (Nazi, pasombra ta nan tabata na mando durante di Dos Guera Mundial) na malu pasombra “nan a faya i no a mata nan durante di Dos Guera Mundial”. Esaki ta kondenabel i inesesariamente ta habri heridanan di pasado. Un pasado den kua a mata miones di hudiu, hende pretu, hende di e grupo Roma i hende ku desabilidat i muchanan oochi. Un pasado den kua hopi a sufri, inkluso Hulanda ku ta den Reino ku nos. Antó bo ta bisa awe ku mester a mata mas hende?
Ta bon pa sa ku anualmente komunidat internashonal a akordá un Dia Internashonal di Nashonnan Uní kontra Holocaust pa rekordá i duna honor na esanan ku a muri na man di Nazinan. Esaki ta tuma lugá denter di poko riba 27 yanüari. E espreshonnan ariba menshoná ta demostrá ignoransia i sigur falta di rèspèt pa yunan di tera ku a lucha i duna nan bida den lucha kontra Nazi. Lo bo kere ku sigur nos ku tambe a sufri na man di otronan i ku ainda ta karga e sikratrisnan di kolonialismo i sklabitut lo sa mihó. Òf nos ta kere ku diskriminashon kontra di nos ta malu, pero ku nos si por diskriminá i lastra otro gruponan?
Kondenabel i repudiabel.
Willemstad, Kòrsou
Alex David Rosaria Blog 