Minister di Gobernashon, Planifikashon i Servisio (BPD) resientemente a argumentá ku dos (2) ‘medewerker’ (kolaborado) èkstra pa kada minister, esta 18 hende mas, lo baha i no subi gastu manera nos tur ku tinu ta mira. Kon e ta yega na tal konklushon? E kolaboraónan èkstra lo hasi trabou ku un consultant mester a hasi. Segun e minister, e kolaboradónan pues tin e kapasidat pa remplasá un consultant ku tin un konosementu spesialisá.
So far so good. Di unda ta saka e kolaboradónan èkstra? Na promé instansha for di riba lista polítiko di e grupo den Fòrti. Tirando un bista riba nan listanan ta keda demostrá ku tin poko kandidato ku konosementu i eksperiensia speshalisá pa remplasá un consultant. Ku asta un grupo grandi di esnan riba e listanan ku a bira Parlamentario ta karesé kontenido. E kolaboradónan èkstra ta simplemente un regalo di nos pagadónan di belasting pa e partidonan hasi fiesta. Nan hendenan ta na bùrt awor.
Loke mi ta bisa no ta teorétiko. Mi a bira minister di Ekonomia i Labor pa Antia (2005) i e partido ku a proponémi a bisa ku di e dos(2) kolaboradónan na mi disposishon, mi por skohe solamente un (1). Mi a pone un ekonomista ku no tabata riba lista. E siguiente djaluna mi a topa e persona ku partido a manda pami. Nunka e a funshoná komo un kolaboradó ni skibi un karta. Es mas e no a ni sikiera pidi pa un ofisina i computer.
Den pasado un ámtenar ku tabata na punto pa keda retirá pasombra e no tabata presentá na trabou, a keda nombrá kolaboradó pa ‘skap’é’ di e medidanan disiplinario.
Ken ta benefisiá ku e ‘fiesta di medewerkers’? No komunidat. Tampoko kalidat di gobernashon. I te ahinda nos ta sigi kere ku nos outonomia ta na peliger dor di hasí di Den Haag?
Willemstad, Kòrsou
Alex David Rosaria Blog 