Ku hopi doló ami, meskos ku hopi otro, ta mira kuantu hende ta muri di COVID. Awe sinku (5) hende mas a laga nos loke ta trese e kantidat na 242 (kompará ku 189 riba 31 desèmber 2021). I manera sifranan ofishal ta demostrá, e kategoria di edat ku mas morto, sigur último tempu, ta hende grandi. Sigun sifranan e grupo ku ménos ta bakuná ta presisamente e hendenan grandi aki.
No por tabata otro pasombra e bakuna kontra di COVID ta e manera mas efektivo te ainda pa evitá morto i hospitalisashon. Ta di lamentá ku un grupo asina grandi a skohe pa no bakuná lo ke por a evitá morto prematuro. Pakiko nan no a hasi esaki? Influensia di esnan ku ta venená pueblo ku mentira i teorianan di konspirashon? Falta di informashon korekto? Konvikshon religioso? Nivel di formashon, status sosio-ekonómiko? Falta di kompas moral? Falta di liderazgo i kapasidat di speshalmente e mandatario di Salubridat? Estudio ku mi ta spera lo hasi, ta bai duna kontesta.
Sinembargo, nada ta trese e hendenan ku a muri prematuramente bèk. E doló inimaginabel di algun mil hende ku a pèrdè nan ser kerí tampoko lo keda friá. Pero, lo por siña lèsnan balioso pa futuro. Esanan den Fòrti i Staten ku ta sostené lokual ta pasa ku nan silensio i indeferensia, lanta for di soño. Si tabatin seriedat, un mandatario ku no ta interesá den midimentu di poder den su partido òf ku no ta mas interesá den su sekta ku salú públiko, lo a lanta bisa: the buck stops with me, lokual kier men: ‘ami no ta bula pipa i skùif kos den skochi di otro, pero ami ta asumí responsabilidat.’
Willemstad, Kòrsou
Alex David Rosaria Blog 