Mei-mei di e konflikto kresiente entre Ukraina i Rusia, Sr. Sergei Ryabakov, Vise Minister di Relashonnan Eksterior Ruso, a bisa despues di kontakto ku Caracas i Havana, ku no ta eksluí ku Rusia ta manda ekipo i atributo militar pisá pa tantu Venezuela komo Cuba. Si esaki sosodé, e Guera Friu nobo den Karibe ku mi a menshoná anteriormente, por bira kayente.1 Kòrsou no por (sigi) ignorá e susesonan ku por parse leu di nos fronteranan.
E konflikto Ruso-Ukraino ku a surgi ta pasombra Rusia pa basta tempu no ke mira Ukraina bira miembro di OTAN (un aliansa militar). Esaki lo trese OTAN muchu serka di teritorio Ruso. Ta un echo ku OTAN for di 1990 a amplia ku miembronan nobo. Loke ta nobo ta ku pa promé biaha China ta djòin Rusia i tambe ta kondená ekspanshon di OTAN ku miembresia di Ukraina.
Dikon e konflikto Oropeo aki no ta leu for di nos? No mester pèrdè for di bista kambionan den poseshonamentu di aktornan di ‘superpowers’ den mundu. Tantu Rusia komo China ta asumiendo un papel muchu mas prominente den Karibe, mientras ku e interes di Merka i Union Oropeo a mengua, pero no a desaparesé. Tambe ta bisto e poseshonamentu di un grupo di pais komo ‘middle powers’2 Algun ta: Hapón, Turkia, Sur Korea ku no ta parse di tin interes inmediato pa e region aki. Otro ‘middle powers’ manera India, Iran i asta den sierto sentido, Taiwan si tin interes den nos region.
No ta promé biaha un konflikto mundial ta tuma lugá den nos region di Karibe. Na 1961, Union Soviétiko a pone misil na Cuba,dor ku Merka a pone misil na Turkia. Merka a respondé ku un blokiada naval di e isla Karibense. E insidentenan e tempu ei den nos region a hiba mundu na rànt di un desaster militar. Na fnal a kita misilnan na Cuba i tambe Turkia.
Otro konsekuensianan pa nos por ta preisnan di gas, i tambe petroli. Tin hopi insertidumbre kiko lo pasa konkretamente, pero Kòrsou no por sigi ignorá loke ta pasa.
Willemstad, Kòrsou
1https://alexdavidrosaria.wordpress.com/2018/12/21/the-new-cold-war-in-the-caribbean/
Alex David Rosaria Blog 
One thought on “Konflikto na Ukraina ta leu foi nos?”