Na 2018, mi a skibi ku e movementu #MeToo ta nesesario pasombra e ta krea mas konsientisashon tokante abuzu, violensia i hostigamente seksual, tantu físiko, verbal, i no-verbal1. Mayoria di e aktonan ta keda kometé pa hende hòmber kontra muhé i tambe kontra e komunidat LGBTQ+, ounke ku e último ta práktikamente silensio riba e tema .
Nos ta biba den un komunidat den kua abuzu mental i físiko kontra hende muhé ta un suseso diario. Resientemente un miembro di Staten pa PNP a yama un señora profeshonal un “mucha”. T’esaki ta keda prolongá falta di rèspèt kontra hende muhé i ta hasi #MeToo nesesario. Den Korte, un Parlamentario di MFK, un delikuente seksual sin remordimentu pa víktimanan di abuzu seksual, ta sapatiá pa bira minister. Kada dia ku e keda sinta i e dos partidonan ruman den koalishon lag’é, ta prueba di falta di eskrúpulo.
Nos tin un problema grandi. Ta opvio tambe ku esaki ta falta di nos tur: hende hòmber i muhé, pero tambe gobièrnu, organisashon i lidernan sosial i religioso ku muchu biaha ta bagatelisá violensia seksual komo algu’ kultural’. Pa un kambio, nos mester di otro tipo di retórika, ehèmpel i komportashon. Nos mester kambia. E promé pa kambia ta e persona den spil.
Ta bisa ku #MeToo a hasi bida imposibel pa hende hòmber. Esta, no por tira un piropo, duna un hende muhé un man mas òf pidi’é pa sali. Payasada. Hende hòmber mester sa òf buska pa sa e diferensia entre un piropo i un komentario seksual bulgar. Meskos ta konta pa e diferensia entre di duna un brasa di konsuelo i frega bo kurpa kontra di e hende. Kua chiste bo ta konta (òf manda) i kua no. E drama ku hopi hende hòmber ta hasi den e era di #MeToo ta simplemente un frustrashon ku no por sigi insultá i denigrá. Rabiá pasombra ta hala nos atenshon komo hende hòmber riba nos komportashon di porko tin biaha kontra di hende muhé. Laga nos realisá ku nos ta biba den un otro era.
Willemstad, Kòrsou
Alex David Rosaria Blog 