Boycott Rusia i esnan ku ta hasi negoshi ku n’e

Hopi hende ta sinti nan mes impotente ante di e situashon di guera i masakre na Ukraina kousá pa Rusia. Kiko nos lo por hasi komo individuo i konsumidó? Boycott Rusia i esnan ku ta hasi negoshi ku n’e.

Último simannan hopi empresa multinashonal a disidí di sali for di Rusia òf suspendé nan operashon eynan. Un kantidat di pais a tuma medida kontra di e invasor ku invadí Ukraina sin provokashon i bombardea áreanan residensial, hospital di maternidat i mata suidadanonan inosente.

Kiko nos por hasi? Ami diariamente ta wak kua produkto Ruso tin riba merkado p’mi no kumpr’é. Tambe mi ta sigui e lista di empresanan ku ainda no a sali for di Rusia i/òf suspendé nan operashon aya. Por buska riba internèt: “companies continuing to do business in Russia”. Den e kaso ei, ami ta stòp di kumpra produkto/servisio di nan. E lista ta kambia diariamente, pasombra kada biaha mas empresa ta sinti e rosea kayente di konsumidónan ku no ke sostené Rusia. Te ku awe, Burger King* ta hasi negoshi trankil na Rusia.

Boycott ta yuda? Si. Puntra esnan ku den temporada di Apartheid a tuma medida kontra di Sur Afrika. Boycott ta hasi doló? Klaro. E ta perhudiká esnan na poder, pero tambe e pueblo di e pais. Final di kuenta loke bo konsenshi mester ta trankil ku n’e ta: e preis di boycott (esta bo keda sin kumpra un produkto X) ta mas ku e preis ku e pueblo di Ukraina ta paga pa e matansa i atrosidat Ruso kontra nan?

Alaska, USA

Update despues di a publiká e blog: Burger King entre tantu a stòp na Rusia despues di risibí hopi preshon.

Advertisement