Yogi Berra, un di e gran streyanan di New York Yankees a bisa:”it aint’t over until it’s over” (kos no a kaba te ora ku e a kaba). Sinembargo si mira nos komportashon, lo bo kere ku COVID a desaparesé manera un mal soño ora bo spièrta.
Siman pasá (awor ku no ta duna sifra diariamente mas) 484 hende a tèst positif, lokual ta kasi 70 infekshon nobo tur dia. Durante e periodo aki 3 hende mas a fayesé. Esnan ku mas ta sufri ta esnan mas vulnerabel i prinsipalmente nos hendenan di edat. Nos mester kuida nan i kombensé nan pa na kuida nan mes, prinsipalmente dor di bakuná ku te ainda ta e manera mas efektivo pa evitá morto prematuro.
Tampoko por pèrdè for di bista e konsekuensianan di Covid, esta entre otro malesa di pulmón, kurason i problema ku salú mental ku konosé un subida grandi.
No. Covid no a kaba, e no a desaparesé. Laga nos komo sosiedat tene kuenta ku esaki.
#covid #covidisnotover #curacao
Alex David Rosaria Blog 