Bati Huda t’un tradishon di odio. Dikon selebr’é, pero zwarte piet, no?

Bati Huda na Kòrsou ta un aktividat religioso den kua durante Semana Santa ta bati un pòpchi ku semehansa di un hende. Simbólikamente e batimentu aki ta revancha kontra Hudas Iskariot, un Hudiu ku supuestamente a traishoná Hesus. Ta straño ku esnan ku semper ta grita kontra di un otro tradishon diskriminatorio, esta ‘zwarte piet’ ta ketu tokante di bati Huda.

For di tempu di Apostolado Katóliko, tabata un kustumber pa riba Bièrnè Santu pone bandera na ‘halve stok’ i traha un pòpchi ku tabata keda públikamente batí ku palu, skòp i moketa.

Bièrnè Santu 27 mart 1682, a bati Huda serka di bahia Santa Ana. Esaki a kousa konsternashon pasombra e pòpchi tabata un representashon idéntiko di e Rabino di Hudiunan di Kòrsou. Gobernashon, ku ya a yega atvertí pa intoleransia religioso, a konsiderá esaki inakseptabel i a prohibí tur aktividat di bati Huda. E prohibishon a dura hopi aña.

Ku batimentu di Huda tabata dirihí riba Hudiunan ta keda spliká den Theologie van de straat i Accentjes van ons land en volk di Pater Brenneker. Brenneker a yama e tradishon aki “een niet echt fijn aangevoelde gewoonte”. Riba Bièrnè Santu òf e djasabra despues, tabata traha algun pòpchi grandi i pone nan dilanti di kasnan di famianan Hudiu ku un bòter di ròm bashí. Tur hende ku pasa por a dal’é un moketa den su kara. Ora solo baha, tabata marcha bou di müsik i alkohòl, kantando kantikanan di bati Huda i asta tin biaha kontra e religion Hudiu, lastrando e pòpchinan den kayanan pa despues bati nan te ora no sobra nada. Normalmente ta sigi un fiesta ku hopi aktividat eskandalósamente imoral.

Na 2019 World Jewish Congress a protestá batimentu di Huda despues di imágennan di batimentu di un pòpchi bistí komo un Hudiu òrtodòks na Polonia, un pais mayoritariamente katóliko. A kita su kabes afó i kima e restu di e kurpa.

Awor, si no ta tolerá e invento diskriminatorio Hulandes di ‘zwarte pieten’, pakiko nos ta keda silensioso pa loke ta trata un tradishon ku ta flagrantemente anti-Hudiu? No ta hipókresia di marka mayó?

Willemstad, Kòrsou

Fuente: Archivo Nashonal, Kerkgeschiedenis Antillen, Pater Brada (1963).

Advertisement