Segun Rumbo pa independensia mental: konosé bo historia pa bo konosé bo mes, un nota di maneho di 2002 di Teritorio Insular di Kòrsou, un Yu di Kòrsou ta keda definí komo: Un hende ku ta biba na Kòrsou òf pafó, ku ta komprondé Papiamentu i ta dispuesto pa traha na fabor di adelanto di Kòrsou. E por deklará na mundu ku e ta akseptá Kòrsou su kultura i historia sin kualkier bèrgwensa. E ta akseptá i kumpli ku e echo ku e ta biba den un komunidat multikultural. E no ta konsiderá elementonan kultural di su propio grupo étniko komo kultura di Kòrsou. E ta akseptá ku su kultura relatá na su grupo étniko ta suheto na kultura Afro (Afro ta: “di Afrika òf relatá ku Afrika òf kultura di Afrika, outor)di Kòrsou. E kultura Afro ta e kultura di Kòrsou i esaki ta dominá tur otro grupo étniko. E nota, firmá pa e Diputado di Enseñansa di e gobernashon PAR i PNP a keda usá despues pa PS, MFK i MAN.
E definishon ariba menshoná tin lus kòrá rònt su kurpa pasombra e ta sali for di e buki di rasismo, diskriminashon, xenofobia den kua e idea sentral ta ku un kultura, grupo étniko ta superior kompará ku e otronan. Akaso nos a lubidá e Tutsi (Rwanda), Rohingya (Myanmar) i Roma (‘zigeuners’) (Oropa), djis pa nombra algun kaso?
Semper a usa elementonan di e definishon ariba pa hustifiká dominio di un grupo riba otro. Aki te kasi 1960 a hustifiká superioridat di religion katóliko riba otro religionnan. Dominio di blanku riba otro -komo si fuera nan tabatin un aprobashon selestial-, a pone ku ta un grupo chikí so por a vota. Derechi di voto pa etnisidat Afro lo a kondusí na kanibalismo.
Pa kolmo e outor(nan) ku ta enfatisá konosementu di nos historia, ta demostrá ku sigur nan no sa historia. Promé ku e yegada (fòrsá) di hendenan di Afrika, tabatin Hudiu, Spañó, Hulandes i no papia mes di e grupo original, e indjannan (caiquetio) ku tur otro a bin haña.
Ami no ta indentifiká ku e definishon ariba. Un grupo étniko su norma i balor no por keda evaluá i balorá usando e norma i balornan di un otro grupo étniko, ni maske esaki ta den mayoria.
Lo bo pensa ku despues di sklabitut, kolonialismo, genosidio, sèksismo, rasismo ku a kousa asina tantu doló, nos lo sa mihó i no akseptá algu semehante di hendenan ku enorme kompleho ku nunka a akseptá nan koló òf etnesidat.
Willemstad, Kòrsou
Alex David Rosaria Blog 