Kuantu biaha bo no a molestiá pa tuma bo kambio di 1, 2 òf asta 3 sèn despues di kumpra algu? Kuantu biaha bo no a prekupá ora e kahera bisabo: “nos ta keda debebo 2 sèn”. Ku nos no ta duna balor na e modeda aki kier men ku e no ta útil mas. Bo tambe a pensa ku lo ta un bon idea pa elimin’é? Esaki lo no ta promé biaha den nos historia.
Na 1926 minister di Kolonia a aserká Gobernadó di Kòrsou pa eliminá e moneda di 1/2 sèn pasombra e tabata kosta mas ku su balor pa traha. Despues di algun dékada a elimin’é. Den añanan 80 a stòp di traha e moneda di 2 1/2 sèn (Plaka). I na 2008 Banko Sentral a primintí eliminá biyete di 25 florin Antiyano (Ang) pa unu di 20 florin Karibense (Cmg). Mas ku un dékada despues nos ta warda ketu.
Un 100 aña pasá bo por a kumpra un mangel, òf bals, lòlipòp i dròp ku 1 sèn. Awe e moneda tin 20 biaha ménos balor kompará ku 1921 teniendo kuenta ku inflashon. Ademas e tamaño chikí i impráktiko ta pone ku fásilmente e ta kai pèrdè. Ripará kuantu moneda di 1 sèn tin abou bentá. Kontamentu di e moneda na establesimentunan i banko ta un aktividat kostoso i e presensia di 1 sèn ta hasi’é mas kostoso.
Tin sierto desbentaha si. Ku eliminashon di e moneda tur preis mester keda ahustá. Normalmente un produkto di Ang 2,51 òf 2,52 mester bira Ang 2,50. Un produkto di Ang 2,53 òf 2,54 mester bira Ang 2,55. Mester di un kampaña di informashon i kòntròl. Echo ta si ku a bira tempu pa eliminá e moneda mal diseñá i inútil aki.
Willemstad, Kòrsou
Alex David Rosaria Blog 