Awe ta Dia Mundial di Poblashon ku ta den lus di e echo ku na 2022 nos lo yega un poblashon global di 8 mil mion. Esaki ta un kresementu di mil mion den último 11 aña. E kresementu no ta pasombra hende muhé ta haña mas yu (fertilidat), pero mas bien resultado di avansenan den sektor i medisina ku ta alargá bida di hende. E kresementu ta trese sinembargo hopi reto: seguridat di alimentashon, garantia di oportunida i derechi igual pa tur hende.
Na Kòrsou nos poblashon no ta krese, pero ta bira prekupantemente chikí i bieu. Banda di fertilidat abou, nos poblashon a kremp for di 2010 ku 10,000 pasombra mas hende a bai ku hende a bin. Ta bon pa realisá ku un poblashon chikí ta trese reto i problema pa nos. No t’asina ku ménos hende tin, mas kos tin pa parti.
Un poblashon ku ta dekresiendo tin konsekuensia negativo pa desaroyo ekonómiko, ‘cost of doing business’, poder di kompra, konsumo, kompetitividat, gastu di kuido, sentido di soledat i produktividat. Esaki ta resultá kaba den kantidat di kas pará bashí, skolnan ku tiki alumno, problemanan ku fondonan di penshon. Prekupante ta e fuga di e klase medio i ‘brain drain’.
Ta komo si fuera nos no ta realisá ku nos situashon aktual ta un bòm ku lo èksplotá si no atendé ku nos problema. Mester di un manheho demográfiko. Mester atendé e kuestion aki no solamente den sektor públiko, pero tambe privá. Kisas mas importante ta pa nos bira konsiente ku nos tin un problema ku ta vislumbrá di bira grandi i inmanegabel.
Willemstad, Kòrsou
Alex David Rosaria Blog 