Djis sigi hunga ku kandela tokante referèndem i independensia

Mas i mas ta hunga ku e idea pa yama un referèndem pa independensia òf kanta independensia den Staten. Lo bo kere ku e grupo aki ta planeando un independensia responsabel manera traha riba mehorashon di kapasidat institushonal, fortifikashon di demokrasia i un enseñansa ku ta kuadra ku e retonan di mayan. No. Mas bien ke independensia pa nan hasi lokual nan ke. Ke bergonsá Hulanda internashonalmente i ta keda insistí ku ta dor di engaño nos no ta riba e Lista di Non-Self-Governing Territories. Nan ta sapatiá di tur manera pa pone nos ariba. E grupo ta sea bobo òf ignorante pasombra bo no mester ta riba e lista pa bira independiente. Puntra South Sudan òf Slovakia.

Ta hunga ku kandela. Apesar di atvertensianan¹, no tin lei di referèndem ankrá den Konstitushon ku ta pone kondishon pa un referèndem pa kambia nos status, esta e persentahe mínimo di hende ku mester vota i ki ora un opshon ta sali ganadó. Sin un lei, si 30% di pueblo vota di kua 51% ta skohe pa independensia, independensia ta gana.

Sin un lei, Staten por kanta independensia si 2/3 parti disidí. Téknikamente -apesar di nos derechi di outodeterminashon- independensia mester pasa Staten-Generaal Hulandes ku posiblemente lo kuestioná pakiko no a konsultá pueblo. I, pueblo aki lo keda ketu, òf lo protestá i akshoná kontra e desishon di Staten?

Mester realisá ku e opshon pa provinsia ta kresiendo². Sin un lei di referèndem tambe ta konta ku si 30% di pueblo vota di kua 51% ta skohe pa munisipio, e eskoho ganadó ta munisipio. Ademas, un otro konstalashon den Staten por kanta integrashon den Hulanda.

Un lei di referèndem ta imperativo. Sin esaki, nos pais ku ya ta sufri di inflashon, debe, forsa di kompra redusí, alimentá pa Covid i un guera na Oropa, por kai den un abismo i divishon nunka bisto.

Willemstad, Kòrsou

1

No referendum without a referendum law

2

Opshon ‘provinsia’ ganando tereno

Advertisement