Mas ku 80 aña pasá nos a bisa ku nos tin un demokrasia mientras muhé no por a vota. Te den añanan 70 ningun muhé kasá por a hasi sièrto transakshon sin pèrmit di nan kasá (handelingsonbekwaamheid), pero nos tabatin demokrasia. Awe nos ta kalifiká e diskriminashon institushonalisá di pasado anti-demokrátiko. Lo bo kere ku nos a siña di nos ignoransia. Lo bo kere ku e víktimanan di diskriminashon di e tempu ei, awe no ta diskriminá otro. No. Ignoransia ta bibu bibu.
LGBTQ+, kontrali na otronan, te awe no tin e mesun derechinan legal. Ademas nan ta sufri desproporshonalmente di diskriminashon, ‘bullying’ i konosé mas suisidio ku kualkier otro segmento den nos komunidat. LGBTQ+ ta hiba e mesun lucha ku hende di koló i muhé (t)a hiba. Un lucha pa igualdat, un lucha pa dignidat i un lucha pa keda rekonosé komo un miembro balorá di e komunidat aki. E ta un lucha pa derechi humano. No ta esaki nos mester ke pa tur miembro di nos komunidat? No ta esaki ta demokrasia?
Fásil pa grita di défisit di demokrasia den Reino i sera wowo pa défisit di demokrasia den bo mes kas. E ta repudiabel i hiprokresia di marka mayó.
Fásil pa keda ketu mientras misanan Kristian (Romano) ta skupi venenu kontra LGBTQ+ i sostené ku plaka brutu partidonan ku ta bai na nan amèn. E odio di e religiosonan ta sali for di nan bukinan ku pa hopi aña a hustifiká sklabitut i diskriminashon kontra muhé. Na lugá di hasi bon uso di e Naf miónnan di plaka di belasting di pueblo ku nan ta haña di presupuesto di pais pa plama empatia manera nan ta prediká, e religionan aki ta kontribuí na destrukshon i divishon manera nan a hasi pa hopi tempu den pasado.
Bo no mester ta miembro di LGBTQ+ pa realisá ku diskriminashon i odio ta robes. Diskriminashon no ta èksistí solamente ora e ta afektá ‘bo’ grupo.
Istanbul, Turkia
Alex David Rosaria Blog 