Nos ta den un krísis profundo pa motibu di un poblashon ku ta kremp

Tur kos ta indiká ku e aña aki tambe nos ta konosé un kremp den nos poblashon. Por sièrto, esaki a keda redusí ku 12 mil alma, kontando di 2010 te ku ougùstùs 2022. Tambe sifranan di CBS ta mustra ku kada biaha nos problashon ta konsistí di mas hende di edat kompará ku hóben. E motibu prinsipal ta pasombra mas hende ta bandoná Kòrsou ku tin hende ta bin establesé. Tambe, fertilidat (kantidat di yu bibu ku un muhé ta trese na mundu) a kai 2.2 pa 1.7 i lo sigu kai por lo pronto segun Fondo di Poblashon di UN.

No t’asina ku ménos hende tin, lo tin mas kos pa parti. Un poblashon ku ta dekresiendo tin konsekuensia negativo pa desaroyo ekonómiko, ‘cost of doing business’, poder di kompra, konsumo, kompetividat, gastu di kuido, fondonan di penshon, salú mental (soledat), produktividat i ‘brain drain’.

Ounke ku kada un di e konsekuensianan menshoná meresé atenshon, mi ta enfatisá e aspekto ekonómiko. Un di e konsekuensianan inmediato di nos depoblashon ta ku negoshinan no ta haña hende (interesá i motivá) pa traha. Tin negoshi ta obligá di tuma hende no kapasitá, loke por kondusí na un kalidat di servisio/produkto inferior. Otronan, obligatoriamente ta sera porta. E problema aki ta pronunsiá den turismo,nétamente e sektor ku mas lihé a bòns bèk despues di e pandemia. E ta e sektor tambe ku a korto plaso ta bai èkspandé ku invershonnan ku ya a keda komprometé.

Loke ta hasi e situashon mas agudo ta e echo ku durante e diferente ‘job fair’ ku a tene pa haña trahadó, tambe pa refineria, e ‘trend’ ta ku e poko hendenan ku a mustra interes den un trabou no ta hóben, sino hende di edat avansá i penshonado. No tin pues sufisiente hende i sigur no hende hóben pa traha.

Ta manera no ta realisá ku nos situashon aktual ta un bòm ku lo èksplotá si no atendé e problema. Mester kuminsá ku un diskushon pa un maneho demográfiko. Pa korto plaso sinembargo mester di un maneho pa importá trahadónan pa desaroyá nos ekonomia. Keda pèrsistí ku nos ta yen di hende sin trabou ku tin gana di traha no ta trese solushon. Meskos ku e intento frakasá di e proposishon inkonstitushonal di 80/20 presentá dékada anterior.

Kuala Lumpur, Malasia

Advertisement