Riba 27 òktober nos ta konmemorá e echo ku 115 aña pasá Moises Frumencio da Costa Gomez (Dòktor) a nase na Ser’i Klip, Otrobanda. Dòktor ta konosí komo kofundadó di e promé partido polítiko di nos pais pa despues lanta su propio partido. Prinsipalmente e ta keda rekordá komo un estadista eksepshonal ku a konstruí riba e fundeshi ku otronan (Généreux Richard de Lima, Abraham Mendes Chumaceiro, i William Charles de la Try Ellis) a pone p’asina logra derechi di voto universal, outonomia interno i desentralisashon. P’ami sinembargo, e legado di Dòktor ta mas ku e logronan konstitushonal menshoná. Dòktor su grandesa ta e echo ku e a hasi nos orguyoso di ta ken nos ta. Ademas, Dòktor mas ku ningun hende den nos historia a inspirá nos pa ta optimista, pa tin speransa den nos mes i nos kapasidat pa bira loke nos ke bira, òf loke nos por bira.
Komo yu di e tera aki i prinsipalmente komo Gomista (manera mi ta konsiderá mi mes) mi ta mira ku awa na wowo kon e konfiansa den nos mes poko poko a larga den e laman di fatalismo, mediokresidat, kompleho di inferioridat i hungamentu di víktima. Si ántes e trio musikal Julio Perrenal (konsistiendo di Pierre Lauffer, Jules de Palm i René de Rooy) durante di e temporada mas skur di Dos Guera Mundial a kanta: “Si gasolin kaba (pasombra tin guera), no ta nada pasombra nos ta sigui na pia”, awe nos ta preferá e kultura di Nanzi, e pensamentu di ‘kon ku para keda’, skòp Den Haag i tur kos Hulandes, evangelisá odio kontra minoria, adorá teoria di konspirashon, vota pa esnan mas inepto, mata talentonan lokal, kulpa estranheronan, djis pa menshoná algun. I si tin un solo estadístika ku ta indiká kuantu hende a pèrdè speransa, ta e kantidat masal di hende, inkluso esnan kapasitá, ku úlimo 5 aña a bandoná nos isla.
Nos fasinashon ku (falta di) ‘lidernan ku ta dal man riba mesa’ ta fo’i lugá. Liderazgo efisiente mas bien ta dependé di kapasidat pa imaginá un futuro den kua e hende ta keda balorá i su talento i fortalesa ta keda rekonosé. Tambe liderazgo ta enserá kapasidat pa komvensé e hende pa ta e mihó hende ku e por ta. Nos mester di e tipo di liderazgo di Dòktor den tur sektor i den tur hogar.
Ipoh, Malasia
Alex David Rosaria Blog 