Komo mucha mi a lanta tende ku un avion a kai den Santa Rosa, no muchu leu for di kas di mi mayornan ku ta keda na La Campana. Te resientemente mi no por a haña detaye di e aksidente manera ki dia e a tuma lugá i kiko a pasa ku esnan na bordo. Porfin mi a logra pone man riba un relato di e aksidente aki danki na Archivo Nashonal.
Riba 10 di sèptèmber 1950, algu promé ku 11 am, un avion ta kai den bisendario di Santa Rosa, Kwartje pa ta mas eksakto. Ta trata di un avion Merikano, aparentemente un Fairchild PR-19 ku tabata trahá di palu. Na bordo tabatin un pilot entrenadó di buelo i un studiante ku netamente tabata siña pa hasi aterisahe di emergensia. Na un dado momento e avion mester a pèrdè altura i e pilot no por a kontrolá e avion, i esaki a kai den un área di mondi. E impakto tabata fuerte i un kantidat grandi di hende den bario ku a skucha esaki a sali pa wak kiko a pasa. E avion a keda totalmente destruí. Milagrosamente e tankinan yen di kombustibel no a èksplotá ni pega kandela. Esaki a pone ku tantu e pilot komo e studiante a sali kasi ileso for di e aksidente.
Kuala Lumpur, Malasia
Alex David Rosaria Blog 