Un triumfo pa emansipashon. Esei ta final di kuenta e nifikashon di e veredikto den Korte na fabor di derechi igual pa tur hende por kasa irespekto nan preferensia seksual. Korte den su veredikto a èksaminá te den detaye nos konstitushon, lei i tratadonan na kua nos pais ta mará. Mi no ta bai diskutí e aspekto legal, sinembargo.
E lucha i triumfo pa igualdat aki ta e mesun tipo di lucha ku a hiba den pasado pa rekonosé un katibu komo hende; pa duna hende pretu derechi ekonómiko igual; pa duna derechi di voto na hende muhé i tur hende hòmber; pa pèrmití un pretu kasa ku un blanku, i pèrkurá ku hende muhé kasá por sigi traha. No tin diferensia. Awe un grupo muchu grandi ta grita kontra igualdat pa LGBTQ meskos ku den pasado a grita kontra emansipashon di hende pretu, hende muhé i promé ku esei, abolishon di sklabitut. No tin diferensia. A yama muhé muchu bobo pa vota. Segun Frater Radulphus: “Ku hende hòmber pretu mes mi tin duda, kòrda muhé”, i hende hómber pretu segun Hamelberg ta asina inkapas ku si nan haña derechi di voto universal “lo surgi kanibalismo i relashon seksual entre hende i bestia.” Nos mester ta kontentu ku Dòktor no a skucha e ignorantenan aki.
E veredikto ya menshoná no ta eliminá tur retórika di odio, prehuisio i diskriminashon, pero e ta un bon paso. Korte por sierto a bolbe demostrá ku e ta e pilá di nos trias politica ku mihó ta sirbi nos demokrasia i estado di derechi. Esaki, kontrali na esnan den Staten i Fòrti ku simplemente no a mustra interes pa e lucha pa derechi igual di e minoria LGBTQ, pero ku a preferá di obedientemente sigi e liña di repudio ku Iglesianan Kristian públikamente tin kontra LGBTQ. Mi ta komprondé, ta hopi plaka a lora den kampaña.
Polítikonan a skohe pa kobardemente no regla e asuntu di matrimonio i laga pa Korte ku si tin wesu di lomba, tuma desishon. Esaki, habriendo kaminda pa polítikonan i esnan ku ta diskriminá, bisa ku ta “Korte di makamba” a pasa matimonio di mesun sekso den nos stròt. Hipokresia i mentira di marka mayó.
Korte a usa rasonamentu i interpretashon di lei. Nos lei. Iglesianan Kristian ta skohe pa pone nos lei un banda, interpretá nan buki i konkluí ku hendenan LGBTQ no tin derechi riba trato igual. Aparentemente e mesun buki ei si no ta kondená krímen seksual di religiosonan kontra muchanan bou di edat. Ken a tende nan papia un palabra ora a sali na kla ku un èks Papa di Roma ku lihé lihé nan a hasi un santu na 2014, tabata sa i a sera wowo pa abuzunan seksual di su iglesia kontra menornan di edat? Ken a tende algu di e moralistanan Kristian riba e miles di religiosonan (Washington Post, novèmber 2022) ku a abuzá di mucha? E Pastornan Kristian por hasi nan mes un gran fabor: no mete ku nos leinan. Baha for di boso trono moralista, stòp di evangilisá odio den boso misanan i stòp di sera wowo pa aktonan kriminal kontra mucha.
Na tur LGBTQ, pero prinsipalmente tur ku ta kere i para pa derechi igual, pabien.
Willemstad, Kòrsou
Alex David Rosaria Blog 