Pa deskonosementu hopi hende, asta esnan ku hopi aña den polítika ta bisa ku mr. dr. Moises da Costa Gomez (Dòktor) tabata den Katholieke Volkspartij (KVP). Esaki no ta bèrdat.
Na 1936 Dòktor i Monseigneur Verriet a lanta Curaçaosche Rooms Katholieke Partij (CRKP). CRKP tabata e partido di mas grandi di Kòrsou pa loke ta trata elekshonnan na 1937 i 1941, pero ta pèrdè ku Partido Demokrat (DP) na 1945. Dòktor, parlamentario pa CRKP, tabata sinti su mes frustrá ku CRKP kua riba instrukshon di Diosesis di Willemstad tabata move muchu poko poko ku outonomia i derechi di voto universal. Awa a pasa hariña ora Pader Mölmann a bisa: “de grote massa mag absoluut niet stemmen”1. Kiebro di Dòktor i CRKP a bira eminente na 1947 i e a bai ku su asiento.
Na 1948 Diosesis, konsiderando ku Dòktor su akshon tabata un traishon, a disolvé CRKP. Na komienso di 1948 elementonan di CRKP a yuda lanta dos partido nobo: Katholieke Volkspartij (KVP) i Nationale Volkspartij (PNP). Dòktor tabata lider polítiko di PNP i Isaac Carel Debrot (no brua e persona aki ku Colá Debrot) tabata liderá KVP, e satélite polítiko nobo di iglesia ku a bira lomba pa Dòktor.
E pakto polítiko-religioso entre KVP i Diosesis di Willemstad no ta dura pa semper. Despues di elekshon di 1959, KVP a forma Bestuurscollege ku DP. Iglesia ta desaprobá esaki totalmente pasombra DP tabata den su wowo e gran enemigu di katólikonan. Mgr. Holterman ta prohibí KVP sigi usa “katholiek” den su nòmber i despues ku KVP no a kumpli ku su instrukshon, esaki ta bai prensa i deklará ku iglesia no ta sostené KVP mas. Na 1960 KVP ta kambia su nòmber di “Katholieke Volkspartij” pa “Konstructieve Volkspartij” i ta sigi usa e abreviashon “KVP”.
E kambio di nòmber no a kalma e poderosonan den iglesia katóliko. E portabos di iglesia, Amigoe di Curaçao, konstantemente tabata tilda KVP di no ta representá katólikonan “real” pasombra e partido a tribi di bai traha ku DP i forma un “monsterverbond”. E korant, den un editorial ta pidi pa no vota KVP pasombra esaki “lo ta funesto”2.
Na 1962 KVP a bai elekshon di Staten i ta saka 0 asiento. Na 1963, elekshon di Eilandsraad, tambe KVP ta saka 0 asiento i KVP despues ta desaparesé. Diósesis ta logra kaba ku KVP.
Na 1966 Dòktor ta fayesé i Obispado ta ninga pa dera Dòktor den un santana katóliko ounke ku e tabata katóliko. Iglesia no a pordoná Dòktor i ta tuma revancha na su morto. Kuriosamente, Isaac Debrot, e promé lider di KVP tambe ta keda derá despues di su morto na 1989 den un santana protestant.
Willemstad, Kòrsou
*Curaçao, 2 augustus 1945, **H. Pieters Kwiers, Ideal Polítiko di Dòktor, 1991
Alex David Rosaria Blog 