E reunionnan di Staten di e último dianan pa aprobá nos presupuesto a bolbe demostrá kuantu miembro di parlamento (ku eksepshon di un grupo muchu chikí) ta kapas pa manehá nos demokrasia. Mi ta papia di demokrasia pasombra nos tin un sistema di demokrasia parlamentario den kua parlamento ta e piesa mas importante. Pero komo tradishon partidonan ta keda manda e kuchúnan di mas stòmpi ku nan tin riba nan listanan bai sinta den Staten. I esaki ta e resultado. Algun hende dotá den redu, ribirishi i helengue, pero ku na ningun okashon por papia ku kontenido kon nan ke duna forma na nos futuro.
Miénstras tantu nos ta ignorá e inkapasidat brutal den Staten i insistí ku nos problemanan ta sinta den struktura estatal i na Den Haag. Ideal pasombra asina nos por bria den nos ròl protagonista komo víktima.
Kòrtiku despues di Statüt, Gezaghèber di Boneiru, Weis de Haseth na 1955 ta proponé pa hasi Boneiru parti di teritorio insular di Kòrsou. Despues no tabatin un solo sabor di eiskrim estatal ku nos no a purba: Nieuwe Unie, Mankomunidat, Federashon Kòrsou-Boneiru, Provinsia, Estado Liber i Asosiá, UPG, Antia Nobo, Munisipalidat, Directe Banden, Koninkrijkseiland, Antia Restrukturá, Integrashon den Venezuela, Independensia, i e ‘grandslam’ mas resien di bira miembro di CARICOM pa asina bira miembro di UN. Un kos ta sigur, hopi kònsultent a djòdjò.
Ketu bai nos ta mira struktura estatal komo e remedi mágiko ku somehow lo resolvé tur problema ku ni sikiera ta di índole konstitushonal manera enseñansa, infrastruktura, demografia, ekonomia i konekshon komersial global.
Di abeha pa dòlfein pa olefante, mayoria animal ta skohe e lider mas kapasitá pa liderá e grupo. Ki dia nos lo tin e kurashi pa wak otro den kara i akseptá ku kontrali na hopi animal, nos si ta keda vota pa esnan sin nivel i sin kapasidat?
Willemstad, Kòrsou
Alex David Rosaria Blog 