Nivel elekshon Reina, Prens i Pancho ta simplemente ‘e kuenta presentá’

Parse ku a tuma un elekshon di Reina, Prens i Pancho di karnaval ayera pa hopi realisá ku nos no ta riba e bon kaminda pa loke ta trata nos rekurso humano, e úniko rekurso di importansia ku nos pais tin. Loke na mi pareser ta remarkabel ta e disgusto i avalancha di komentario riba e inkapasidat, falta di konosementu i ignoransia di e kantidatonan. Esaki ta un tendensia nobo, esta ku nos ke hende di kalidat liderá, den e kaso aki nos karnaval? Pasombra nunka ántes mi a lesa/tende e mesun furia ora ta trata di mediokresia den gobernashon, den kompanianan privá, i serka maestronan di skol. Kontrali. Aparentemente nos tin pas ku kriminal ta representá nos den Staten i gobernashon. Nos no ta prekupá pa pone ‘the right man on the right place’; nos no ta keha ora baha rekesitonan di kalidat di maestronan di skol, i di polis; tur hende por skibi Papiamentu manera e ke den korant, den dokumentunan ofisial di Fòrti i Staten; no ta tribi di papia di pastornan kriminal i nan krímennan kontra mucha bou di edat; i ora un ‘periodista’ durante konferensianan pa prensa di Konseho di Minister demostrá ku e no ta kapasitá pa hasi e trabou ku e a bin pa hasi, ta tene duele di dje. Prinsipalmente nos no tin problema pa sigi vota i elehí hende inkapas pa manehá nos pais. E loke a pasa den un elekshon di Reina, Prens i Pancho di karnaval ayera no tin hopi konsekuensia direkto pa pais, pero e ta un resultado lógiko di kon nos a malmanehá nos rekurso humano i kon nos a i ta komprometé nos futuro, nos generashonnan ku ainda tin ku nase. Ki dia nos ta demostrá e mesun disgustu i furia pa defendé nos pais di e ola di inkapasidat?

Willemstad, Kòrsou

Advertisement