Promé Konferensia Mesa Rondó 75 aña pasá: intriga, pelea i kontroversia

Mi a primintí para ketu na dies fecha importante durante 2023.¹ Mi ta start ku 75 aña Promé Konferensia di Mesa Rondó (RTC): “deliberashon entre teritorionan Ulandes pa yega na un Reino nobo”. Despues lo mi trata e aspekto legal di e RTC. Awe mi ta trese e konteksto kolorido i kontroversial rônt di e RTC na kua a dediká poko atenshon.

Introdukshon
Na 1923 Kòrsou ta entregá e promé petishon pa outonomia na Ulanda. Sinembargo e proseso di outonomia ta start na 1942 ora Reina Wilhelmina anunsiá ku kolonianan lo haña mas di bisa. Aki a instalá vários komishon pa delineá e direkshon konstitushonal nobo. E protagonista tabata dr. Moises Frumencio da Costa Gomez (Dòktor) di Curaçaosche Rooms Katholieke Partij (CRKP).

Bataya religioso
Asina anunsiá ku e RTC lo ta na sèptèmber 1947, pelea ta start pa motibu di afiliashon religioso. Tabatin un preshon pa no nombra hopi katóliko pasombra nan ta “ménos desaroyá”. Korant no-Katoliko i pro-Partido Demokrat (DP) Beurs- en Nieuwsberichten ta alimentá e preshon, mientras Amigoe di Curaçao, katóliko i pro-CRKP tabata kontra. Finalmente, Katólikonan ta haña ménos representante ku no-Katólikonan.

Kuchú riba mesa
DP ta start tempran ku ponementu di pia pa Dòktor. Efraim Jonckheer, lider Protestant di DP i ganadó di elekshon na 1945, a mira kon Dòktor -intelektualmente superior i ku konosementu vasto di ‘politiek Den Haag’- tabata haña tur mérito pa e kambionan na kaminda. Pakolmo e relashon entre Dòktor i su partido CRKP a deteriorá. Dòktor tabata mas envolví ku Komité di Pueblo (KdP) ku tabata pinta pa bira un partido. Jonckheer tabata sa ku si Dòktor lanta un partido, e lo ta un menasa grandi. DP a pone kuchú riba mesa bisando ku si “Ulanda no rekonosé nos outonomia, e lo bandoná e RTC.”

Delegashon Antiano
Despues di múltiple intento, Staten riba 2 desèmber 1947 a akordá e siguiente delegashon. Pa Kòrsou: Dòktor (CRKP), Efraim Jonckheer, Stephanus van der Meer (DP), i Alex Curiel (bankero serka Maduro’s & Curiel’s Bank, sin partido). Amigoe di Curaçao den un atake feros ta yama Curiel: [vertegenwoordiger van] een langzaam uitstervende Joodse aristocratie [..] die ééns drieduizend en nu nog maar nauwelijks vijfhonderd leden telt”. Hopi tampoko a lubidá ku anteriormente Curiel tabata den Korte pa hasi negoshi ku Alemania Nazi, loke tabata kontra di Regeling Rechtsverkeer in Oorlogstijd. Pa Aruba tabatin: Cornelis Eman, Juan Yrausquin (Arubaanse Volkspartij). Boneiru: Lodewijk Gerharts (sin partido). Islanan Ariba: William Plantz (sin partido). Dr. Willem de La Try Ellis konsiderá e mihó hurista yu di tera ku a hasi hopi trabou preparatorio pa nos pais tokante RTC, a keda inkluí den delegashon Ulandes ya ku aki e no tabata balorá. Apertura RTC ta keda fihá via KB pa 21 yanüari 1948.

Un mayoria di delegashon Antiano ta yega RTC lat
Miembronan Plantz, Irausquin, Eman, van der Meer i Jonckheer a tuma un ruta largu i kostoso pa yega Ulanda. Algun a bai New York 14 yanüari i otronan 17 janüari. Despues di algun dia nan a kue e barku Queen Mary bai Southhampton, Inglatera i kontinuá pa Londen. Aya nan no por a haña buelo pa Ulanda. Dòktor i Curiel ku si tabata na Ulanda, a logra posponé e RTC pa warda riba esnan na Londen. Finalmente e sinku miembronan ta ‘charter’ un avion pa Schiphol riba 23 di yanüari apesar ku KLM a pone un avion disponibel. Gerharts ku a tuma un ruta direkto a sali 17 yanüari i yega Ulanda riba 19 yanüari! Apertura RTC ta 27 yanüari 1948.

Fiesta te mardugá
Curiel a preferá keda apart den un ‘suite’ luhoso. Ademas, e a bai e a barka dos Buick nòps nòps for di Kòrsou p’e usa apesar ku tabatin outonan luhoso na disposishon di e delegashon. Hopi a desaprobá su komportashon, ounke supuestamente e mes lo a paga su gastunan (èkstra). Tambe a bin dilanti ku miembronan di delegashon lo tabata bishitá famia na lugá di traha i asta un lo a bai keda serka amigunan den un otro siudat. E yu di tera, dr. de la Try Ellis a keda den un kamber modesto den e restaurant-hotèl vegetariano Pomona. Pa kolmo, a raportá fiestamentu di nos delegashon, inkluso unu te mainta. Segun un korant: “Curaçao fuifde tot half vijf”.

‘Walkout’
Despues di vários seshon tras di porta será, riba 16 di febrüari 1948 a tene e promé reunion públiko. Van der Meer papiando tambe na nòmber di Eman, Yrausquin i Jonckheer ta bisa ku no a sigi e mandato di Staten i a bandoná sala. Da Costa Gomez i Gerharts ta kritiká e desishon aki. Riba 27 di febrüari Jonckheer, van der Meer i Yrausquin ta bandoná Ulanda. Segun Dòktor ta na mesa ta solushoná kos.

DP ta denunsiá Ulanda i Venezuela ke aneksá islanan ABC
Despues di a bandoná e RTC, DP ta pidi Nashonnan Uní i Union Panamérikano (PAU) antesesor di Organisashon di Estadonan Amérikano pa kondená Ulanda. Esakinan no ta prosperá. Hopi hende a desaprobá e akshon di traishon di DP. Venezuela a tuma bon nota di e petishonnan di DP i durante un enkuentro di PAU (30 mart-2 mei 1948) ta deklará ku e islanan ABC ta pertenesé na teritorio Venezolano.

Alegria pa Dòktor, desapunto pa Jonckheer
E RTC ta tèrminá 18 di mart 1948. A logra inkluí tur punto di Antia i a bai di akuerdo ku 17 moshon i resolushon. Dòktor a haña espasio ku baimentu di e miembronan malkontentu pa elaborá riba su vishon pa un Reino nobo. E aktitut di DP a pone Dòktor su popularidat krese na Kòrsou. Poko despues di e RTC e ta lanta Partido Nashonal di Pueblo ku un aña despues ta gana elekshon, i asina propiná DP su promé derota elektoral.

Willemstad, Kòrsou

Funte: Nationaal Archief Curaçao; Beurs- en Nieuwsberichten, 4 augustus 1947; Beurs- en Nieuwsberichten, 2 december 1947; Amigoe di Curaçao, 18 december 1947; Dr. Kasteel, A. “De Staatkundige Ontwikkeling der Nederlandse Antillen (1956)” Elsevier Weekblad, Algemeen Handelsblad 26 januari 1948; “Negen Mannen en een Vraagteken”, maart 1948; De Surinamer, 2 maart 1948

Na 2023 ta para ketu na 10 fecha importante den nos historia

Advertisement