Kita plaka ku nos ta duna religion i sekta ku ta evangilisá odio

Segun Ministerie van Bestuur, Planning en Dienstverlening (BPD) tin sinku (5) organisashon religioso ku tur aña ta haña plaka di presupuesto, esta di pagadónan di belasting di Kòrsou (Erediensten van het Land Curaçao). Nan ta Bisdom Willemstad, Verenigde Protestantse Gemeente van Curaçao, Joodse Gemeente, Methodist Church i Evangelische Broeder Gemeente Curaçao. E regalo ta suma Naf kasi 2 mion, pa aña. Tabata imposibel pa haña informashon pakiko sierto organisashonnan religioso no ta risisbí plaka. Ta posibel ku ta Gobièrnu ta disidí kua religion ta digno pa risibí plaka di pueblo? Tampoko ta duna un rason pakiko tin diskriminashon di pago pa religiosonan di e diferente gruponan “aprobá pa Gobièrnu.” No tabata posibel haña informashon ku ta e plaka di Kòrsou ta keda repartí bou di sièrto gruponan religioso na Aruba, Boneiru, Saba, Statia i St. Maarten ku ta pertenesé na Bisdom Willemstad. Tampoko tabata posibel haña sa si tabatin kòntròl di Kontrolaria General. Banda di e supsidio mionario aki, organisashonnan religioso no mester paga mayoria belasting ku tur otro si ta paga. Esaki ta inkluí kolekta i otro tipo di regalo risibí. No ta konosí kuantu plaka esaki ta suma. Hinter e kuestion di plaka/supsidio pa religionnan no ta transparente i aparentemente ta reina un sekresia.

Organisashonnan religioso mester tin un lugá den nos komunidat pa prinsipalmente fungi komo kompas pa pas, kompashon, trato i hustisia igual pa un i tur. Esaki no ta e kaso sinembargo. Vários organisashon religioso ku ta risibí nos plaka ta moralmente bankarota. Ki guia religiosonan i shèfnan di sekta ku ta kometé krímen seksual kontra ménor di edat i otro aktonan bochornoso por duna? Remarkabel ta ku semper nan ta kla pa mustra dede riba otro den nos komunidat ku segun nan no ta “biba segun nan kreensia personal religioso.” Pero nunka ta papia di e skandalnan den nan organisashon religioso manera alkoholismo, “blackmail” i pedofelia. Na lugá di atendé ku nan desòrdu, nan ta pòst nan religiosonan ku faya di un parokia (isla) pa otro. Ora, bou di preshon Obispado a lanta Komishon Koeijers pa investigá abuzu seksual di religioso a sali bisa ku tur kos ta “koek en ei” i a “doek op” e komishon. Aparentemente e komishon no a publiká ni sikiera un number di telefòn pa risibí keho.

Últimamente, ku sosten di Fòrti ku a risibi plaka na kantidat grandi di sierto organisashonnan religioso i sektario, a bolbe ataká e grupo LGBTQ+ ku un odio satániko. Kada okashon ku nan haña, ta prediká i evangilisá e odio aki. Ta poko probabel ku religion i sektanan ku tin un “track record” di odio (nan tabata kontra di abolishon di katibu, kontra derechi di voto pa hende muhé i mayoria hende hòmber pretu), rasismo i diskriminashon lo kambia pronto, sigur no e ekstremonan Kristian ofensivo. Lokual si por hasi ta penalisá e ekstremonan peligroso aki ku kada biaha ke mas poder polítiko, den nan pòtmòni. Mester eliminá e regalo mionario di kada aña i pone tur organisashon sekta religioso paga belasting manera tur otro.

Willemstad, Kòrsou

Generashon nobo ku táktika bieu di odio kontra LGBTQ+

Iglesianan a uni pa antagonisá i sembra odio

Advertisement