Awe Lucina Elena da Costa Gomez née Matheeuws, Shon Lou manera mi tabata yam’é, lo a hasi 94 aña si e tabata na bida. Segun un señora yu di tera doktorá den sosiologia a yega di bisa mi basta tempu pasá: “Shon Lou ta e vershon di Kòrsou mas serka di Jacqueline Kennedy Onassis.” Mi ta reprodusí mi rekuerdonan di Shon Lou.
Mi a siña konosé Shon Lou na 2006, algun siman promé ku e promé elekshon na kua mi a partisipá. Mi a keda invitá pa su kompañero di bida, Sr. Juancho Evertsz (dfm), ku kier a sera konosí ku mi i pa bisa mi ku pa di promé biaha for di dia ku e a retirá for di polítika e lo bai vota i lo vota pa mi. Di e promé enkuentro ei, mi amistat ku Shon Lou a krese i nos a gana otro su konfiansa.
Komo Presidente Honorario di Fundashon mr. dr. Moises Frumencio da Costa Gomez, Shon Lou a pidi mi bira Presidente di e Fundashon. Lokual e a pidi mi despues komo Presidente ta pa e papia personalmente ku kada posibel miembro nobo pa e direktiva di e Fundashon. I ta esaki mi a siña i apresiá di e persona Shon Lou: e importansia ku semper e a duna na kontakto personal. Ora e no por a haña mi na telefòn mi tabata risibí su notanan skibí na man. Ta p’esei no por ta un sorpresa ku su úniko remetido ku e a yega di skibi manera e a bisa mi, ta ora dos korant na Papiamentu di atardi a akus’é di ta menospresiá e pueblo dor di eksihí ku hende mester a traha un sita via di telefòn i no por kana drenta asina asina den su ofisina eksihiendo un kòmbersashon. Aparentemente e korantnan tabata haña ku ta un eskándalo ku pueblo mester traha un sita promé. Den su remitido den e korant Amigoe di Curaçao di 29 novèmber 1974 titulá Miho Rabia ku Duele e a pone bon kla ku: “Lucina no ta tende hende, hari cu nan, haci bunita, sin haci nada pa nan.” Den e remetido aki e a dal Partido Demokrat duru akusando nan di a bai skondi den eksterior i no dediká atenshon at all na pueblo.
Un di e historianan ku mas mi a gosa sinembargo ta tokante di dos hende ku durante kampaña a drenta su ofisina ku awa na wowo pa papia di un problema personal. Un miembro di famia lo a muri i no tabatin sufisiente plaka pa der’é. Despues di a skucha nan pèrtá, Shon Lou a duna nan un kantidat di plaka. Su siguiente dia Shon Lou a pidi dos hende di konfiansa pa kumpra un krans i hiba esaki pa e famia en kuestion. Shon Lou ta konta ku su hendenan di konfiansa a pasa hopi trabou pa haña e kas unda tabatin un …fiesta bailabel. Disgustá e dos hendenan a bai bèk ku e krans e siguiente dia serka Shon Lou i a konta kiko a pasa. Nan a konseh’é pa desenmaskará e gañadónan i pone nan paga e plaka bèk. Shon Lou, ku un enorme sonrisa riba su kara a sigi kontami ku e a bisa nan ku un trankilidat ku solamente bo por tin basá riba eksperensia di bida i polítika: “Sea ku nan a usa e plaka pa entiero òf pa fiesta, nan lo vota pa nos partido. Si nos bai konfrontá nan, nos lo pèrdè plaka i pèrdè e voto. Pues laga nos hasi manera nos no sa kiko a pasa”.
Willemstad, Kòrsou
Alex David Rosaria Blog 