Eksaktamente 195 aña pasá, na 1828, Hulanda ta disdí na krea un Konseho Munisipal pa isla Kòrsou. Esaki tabata konsistí di un Presidente, dos diputado, i kuater konsehal. Na 1828 tambe a hinka tur seis isla Hulandes Karibense, plùs Sürnam den un kolonia ku ta goberná pa un Gobernadó General na Paramaribo. Den e struktura aki, Curaçao en onderhorigheden tabatin un Raad van Policie, na kabes un Direkteur ku mester a raportá na Paramaribo. Tambe tabatin 5 Raden van Policie (pa Aruba, Boneiru, Saba, Statia i St. Maarten). Pues, solamente Kòrsou tabata un munisipio. Tur esaki ta keda reglá den e Konstitushon di 1828.
E Konseho Munisipal di Kòrsou tabata e di tres nivel di gobernashon i e tabata ubiká den Kas Munisipal kaminda awe ta e edifisio di K.N.S.M. den Heerenstraat. E promé Presidente tabata Sr. H. Schotborgh i e di dos, Sr. Theodorus Jutting. E tareanan di e Konseho Munisipal tabata solamente di índole atministrativo i di kuido di iglesianan, kasnan di kuido pa hende pober, leproso òf ku enfermedat mental. Den práktika sinembargo e Konseho tabata fiha preis máksimo pa pan, karni di baka, porko, karné, kabritu i turtuga. Abou, un ehèmpel di un anunsio típiko den De Curaçaosche Courant di 26 juni 1830.
Bekendmaking. Secretarie van het Gemeente-Bestuur, den 25sten Juny 1830. Het Gemeente-Bestuurdezes Eilands, brengt ter kennis van en gelast by deze aan alle Broodbakkers dat de Brooden voor de volgende week te bakken het gewigt zullen moeten houden van 20 Oncen voor 15 Centen; terwyl de Fransche Brooden Een Oncen minder zullen kunnen wegen op pœne als by publicatie van den 16den Maart 1824.
E Konseho Munisipal a frakasá pasombra e tabata falta outoridat pa aktua. Tur ‘desishon’ tabata provisorio te na momentu ku esaki keda aprobá pa Raad van Policie (riba nivel sentral pa e seis islanan) pa despues esaki bai Paramaribo pa ratifikashon. E a stòp di eksistí riba 15 aprel 1833, 190 aña pasá. Tur tarea di e Konseho Munisipal a pasa pa Raad van Policie. Den e Konstitushon di 1833, e lasonan konstitushonal nobo ta keda establesé.
Willemstad, Kòrsou
Alex David Rosaria Blog 