Pa di tantísimo bia, un Miembro di Parlamento ta haña su mes den problema ku hustisia. Si no ta pa soborno, ladronisia, publikashon di sekreto, ta pa akto seksual kontra mucha i labamentu di plaka. Tin a keda será, prohibí di ta minister, miéntras otro a sera ‘deal’ kuchi-kuchi ku Ministerio Públiko pa su kaso no bai dilanti hues.
No bisami ku e komportashon kriminal i bochornoso di e Miembronan di Parlamento ta un refleho di nos poblashon. Hasi e kálkulo. Tin solamente 21 miembro di Staten. Fásilmente bo ta konkluí ku tin mas komportashon robes den Parlamento ku pafó.
Kiko awor? Ki dia partidonan ta pone hendenan kuerdo i honesto riba lista? Ki dia ta bin ku un ‘gedragscode’ ku por sierto mi a proponé na 2015?
Parse mi ku e mihó kos ku nos por hasi ehersiendo nos derechi di voto ta stòp di vota pa partidonan ku ta sigi pone e tiponan aki riba lista. Esta, sin eskrúpulo i sin konosementu. I si nan pone nan riba lista mes, no vota pa nan. E ta parsemi fásil, pero ta parse mas bien ku tin muchu votadó sadomasokista ku ta gusta sla, maltrato i doló.
Willemstad
Alex David Rosaria Blog 