Kuantu morto mester kai promé ku reglamentá ‘vaping’?

Vaping ta malu pa salú di hende. Esei nos sa. Kon malu eksaktamente, siensia
ta investigando. Rason sufisiente pa reglamentashon i prohibishon di vaping den sitionan será.

Meskos ku sigaria, e-cigarettes ta kontené míles di kímika. Entre nan,
supstansianan peligroso manera metal pisá (arsenic, cadmium ku ta
presente den bateria) ligá na kanser. Tambe e ta kontené polyaromatic
hydrocarbons (presente den karbon i kombustibel fósil) ku una bes den bo
kurpa, por ta kanseroso. Vaping kasi semper ta kontené nikotina. Tin vape pod di 2 ml pa e-cigarettes ku e mesun kantidat di nikotina ku 2 paki di sigaria.

Dependé di e dósis i kuantu biaha bo ta eksponé bo mes na e supstanshanan
aki, kon negativo nan ta pa bo salú.

Final di kuenta, siensia ta konkluí ku vaping tin e mesun supstanshanan
peligroso ku sigaria, i asta mas. Ta trata di supstanshanan pa produsí e vapor,
pa kenta e e-cigarette i tambe pa duna un smak agradabel (ku bista riba e muchanan) segun American Heart Association.

Ta bende e-cigarettes supuestamente komo un manera pa stòp di huma sigaria. Esaki no ta kuadra ya ku mundialmente e hóbennan ku a kuminsá ku vaping no tabata humadó di sigaria promé. I e humadónan di sigaria ku a pasa pa vaping, mayoria biaha ta vape i huma pareu. E mihó manera pa stòp di huma ta simplemente no huma mas òf usa pleister di nikotina.

E vapor di e e-cigarettes no solamente ta peligroso pa esun ku ta vape, pero
tambe esun ku ta den su serkania (i no ta vape).

Tin un merkadeo agresivo di produktonan di vaping, dirigí  riba mucha. Djis studia e kampañanan di promoshon, prinsipalmente riba plataformanan sosial.

Despues di hopi mion di morto, a reglamentá tabako i humamentu di tabako den sitio será. Kuantu morto mester kai pa reglamentá vaping i prohibí vaping den lugánan sera?

Willemstad