![](https://alexdavidrosaria.wordpress.com/wp-content/uploads/2020/09/14100463_1075135775933685_5750903010598540412_n.jpg)
Dignidat ta un konsepto universal ku ta eksistí for di komienso di humanidat entre 5 pa 7 mion aña pasá. Biba ku dignidat, trata otro ku dignidat asta si e ta prisonero, ta un derechi humano ankrá den vários konstitushon i tambe dokumentonan di Nashonnan Uní.
Sinembargo, ora yega na muri ku dignidat, ku ta e definishon di eutanasia, hopi (seudo) moralista ta sapatiá. Eutanasia ta basá riba dos palabra griego “eu”(bon) i “thanatos” (morto).
Dignidat no ta un konsepto státiko. Ora nos ta hóben, dignidat tin un otro nifikashon ku ora nos tin mas edat, ta sufri di malesa(nan) ku ta kousa doló insoportabel, i ta hasi imposibel pa funshoná manera un ser humano.
Gruponan kontra, prinsipalmente sierto religion i sekta, ta kere ku ta un di nan diosnan so ta disidí riba morto. Pa straño ku por zona, den e kaso aki si, nan ku ta yama nan mes religioso, ta kere den teknologia médiko moderno. Un pregunta importante ta: Te kon leu teknologia ta prolongá bida? Kisas mas pertinente: Te kon leu ta deseabel prolongá morto i doló? Den ken su benefisio ta pa prolongá esakinan? Sigun mi no esun ku ta sufri inhumanamente i ku otronan ke tene na bida a kosto di tur kos, irespekto su sufrimentu i falta di dignidat.
Mi no ta papia di teoria. Mi ruman chikí, kasi 7 aña pasá, no kier a sigi biba un bida sin dignidat i sufri di doló insoportabel ligá ku kanser inkurabel. Su kurpa, su desishon. Mi a sosten’é.
Tin algun tipo di eutanasia ku en general ta kai den dos kategoria: pasivo (ninga tratamentu médiko/teknológiko) i aktivo (aktivamente yuda un hende muri dignamente ku p.e. atministrashon di un droga). Den e dékada aki, ku no a yega ni na su mitar, mas pais kompará ku tur dékada anterior, a legalisá eutanasia.
Ta tempu pa hiba un diskushon sano riba e tema aki. Komo Parlamentario mi a bisa esaki for di 2013. Sinembargo no ta un tarea fásil.
Willemstad/www.alexdavidrosaria.blog