![](https://alexdavidrosaria.wordpress.com/wp-content/uploads/2024/06/img_4949.jpeg?w=640)
Despues ku e grato notisia a drenta ku tur kos ta kla pa nos bira Miembro Asosiá di CARICOM, mi a haña vários felisitashon personal i via medionan sosial. Mi a boga semper pa drenta e famia Karibense i kasi 20 aña pasá mi a habri e porta ora mi a bishitá e Sekretario General di CARICOM, Sir Edwin Carrington, na Georgetown, Guyana. Komo minister di Ekonomia i Labor na 2005, mi tabata pará kasi mi so relashoná ku e tema di CARICOM ya ku koleganan no a mira e benefisio. Otronan tabata kombensí ku si nos buska mas aserkamentu ku Karibe, Hulanda lo rabia ku nos.
Fuera di e arena polítiko mi a guia desena di studiante ku nan tésis final riba CARICOM. I e último añanan tambe mi a keda envolví ku e tema i trahando tras di kortina ku ekspertonan Karibense di dos Think Tank regional ku kua mi ta asosiá: Global Americans i Caribbean Policy Consortium.
Mi ta kontentu ku a logra konkretisá ku CARICOM. Klaro ku ya kaba sièrto figuranan a start kampaña di menospresiá kontra esnan ku a para na kuna di e logro aki. Konosedónan di materia si sa ku e tipo di prosesonan aki no ta keda realisá den un fregá di wowo. E a tuma kasi 20 aña. Klaro ku lo mi tabata ke esaki keda realisá mas lihé. Dr. Carrington a bisa mi ku mi petishon mester keda studiá pasombra e tambe konosé e menospresio ku histórikamente nos a duna nos bisiñanan.
Pabien na gobièrnu ku e logro. Loke mi ta sinti falta ta mas transparensia. Riba kua tereno tin prioridat pa koperashon, ki tipo di koperashon, kuantu plaka e Miembresia Asosiá ta enserá i kon nos ta bai hasi pa ku representashon di nos hendenan na (e vários órganonan di) CARICOM?
Danki na esnan ku a balorá mi esfuersonan ku no tabata pa probecho polítiko, sino un konvikshon basá riba algu simpel: ta den nos benefisio pa buska aserkamentu ku nos bisiñanan i nos propio region.
Willemstad, Kòrsou
tur kos di e actually gobièrnu ta lali lali I mirando nan performance na IPKO so mi kurpa ta kué rel pa futuro do Kòrsou
LikeLike
Mi tambe ta tene mi kurason. Nos ta keda selebrá bobedat, korupshon i onkunde. Warda wak ora tin elekshon.
LikeLike
Congratulations! Keep up the good work!
LikeLike
danki
LikeLike