Di abeha pa hiena. Di chimpansé pa olefante, animalnan soshal ta skohe esun mas kapasitá pa liderá. E eskoho aki ta basá riba kua por duna mihó guia, kordiná aktividat, tuma desishon kolektivo i defendé hinter e grupo kontra peliger.
Ta un lástima ku nos komo hende -supuestamente e ser ku mas intelekto,- no ta hasi meskos. Mi no ta papia di kuementu di poder estilo gòlpi di estado, pero kasonan kaminda pueblo demokrátikamente, den elekshon liber ta vota i pone hende ku ningun klase di kapasidat, na poder. Manera den nos pais.
Nos ku tin un demokrasia parlamentario i tur dia di nobo mester mira Miembronan di Parlamento (ku eksepshon di un grupo muchu chikí) sin konosementu básiko di prinsipionan di demokrasia manehá nos demokrasia. Kon nos por kere ku nos demokrasia ta riba e bon kaminda si esaki sigui ta den man di hende ku no tin kapasidat pa guia pueblo i protehá esaki kontra peligernan di awe i mayan?
Apesar ku nos ta persistí ku défisit demokrátiko ta pa falta di Hulanda, falta di kapasidat di e gerentenan di nos demokrasia ta ‘e mama di tur défisit.’
Nos tatanan di outonomia a lucha pa un struktura demokrátiko parlamentario outónomo ku a primintí di sirbi nos interesnan kolektivo. Miéntras ku a logra instalá e struktura demokrátiko nobo na 1951, nos a faya i ta sigui faya den sentido ku no a sòru pa tin hende kapasitá pa manehá e struktura demokrátiko.
I miéntras pueblo ta sigui vota pa nan, partidonan ta sigui bringa ku otro pa pone esun ku ta mas popular den kantamentu, ponementu di ‘fever’ i Facebook riba nan lista.
Hopi nos a papia di e strukturanan demokrátiko/estatal. Te awe, sea ku ta UPG, mankomunidat òf Aruba+, nos no ta dediká atenshon sufisiente pa traha riba e hendenan ku tin ku manehá e strukturanan aki. E fayo aki ta e défisit demokrátiko di mas grandi den nos pais. E no ta na Den Haag, sino den Punda.
Willemstad, http://www.alexdavidrosaria.blog
Alex David Rosaria Blog 