E yu di tera J.M.S. di 33 aña di edat, na un manera kruel a mata su ruman muhé di 9 aña i su subrino di 6 aña riba bispu di Pasku di 1953. E víktimanan a muri a konsekuensia di sla na kabes. Ademas, e mucha muhé lo a keda ataká seksualmente, lokual no por a determiná ku seguridat ya ku e restunan ku a keda atras den mondi ya tabata parsialmente devorá pa animal i warawara.
E dòbel asesinato a komové nos isla. Ministerio Públiko a eksihí i haña kastigu di morto den promé instansia na 1954, Despues, den Korte di Apelashon ta konfirmá e desishon di pena di morto. Mas lat, e kaso ta bai pa Cassatie na Hulanda ku e petishon pa “gratie.”
Tabatin un (1) método pa ehekutá kastigu di morto den nos pais: palu di horka.
Wetboek van Strafrecht 1936 ta duna algun detaye: “De doodstraf wordt door den scherprechter uitgevoerd op een schavot, door den veroordeelde met een strop om de hals aan eene galgvast te maken en een luik onder zijne voeten te doen wegvallen.” (Wetboek van Strafrecht van 1936).
Un problema serio den e kaso di J.M.S. tabata ku no tabatin burdugu (beul) na Kòrsou ni palu di horka (schavot).
Promé ku e kaso di J.M.S., ni un kondena di morto a keda ehekutá. Último tabata na fin di siglo 19. A base di esaki Gobernadó a instalá un komishon pa wak si mester mantené pena di morto. E komishon na 1957 a disidí ku mester eliminá pena di morto pa e.o. asesinato di mucha. Pena di morto sinembargo no a desaparesé totalmente for di nos bukinan di lei i e artíkulo ku ta hasi posibel pa apliká pena di morto, a keda eksistí.
Na 1991 e fundashon anti-droga na Kòrsou (F.A.M.E.) a kore kampaña pa trese kastigu di morto bèk. Apesar ku tabatin algun hende konosí (unu a asta bira minister di Hustisia i Presidente di Staten) promoviendo e idea aki, nunka e a lanta for di tera.
Na 2010 a kita esaki kompletamente. Presidente di Staten, ku siendo miembro na 1991 di FAME a boga pa trese kastigu di morto pa baronnan di droga, a anunsiá ku a elimin’é.
Willemstad, alexdavidrosaria.blog
Alex David Rosaria Blog 