Situashon di Haiti na plaka chikí

Na 2021 e presidente Haitiano, Jovenel Moïse, ta keda asesiná. Na e momento
ei no tabatin un parlamento instalá i Konstitushon di Haiti no ta bisa kiko
mester hasi den un kaso semehante. Nashonnan Uní na Haiti ta deklará ku Ariel
Henry, esun ku tabata nominá pa bira premier bou di Moïse, ta bira lider di Haiti. Henry no tabata legalmente instalá pero a keda na poder danki na sosten di algun pais aliado, prinsipalmente Merka.

Durante 3 aña polítikonan Haitiano a pleita ku otro. Henry su mando
tabata korupto i no tabata duna kontesta na dolónan di pueblo. Esaki a pone ku
gèngnan na Haiti a bira aktivo, multipliká, krea kaos i stroba funshonamentu di
gobièrnu i su servisionan. Awe e diferente gèngnan ta okupá 80 porshentu di e
kapital Haitiano, Port-au-Prince. Nada ta funshoná i tur hende, ku eksepshon di e élite, ta bira mas pober.

E luna aki Henry a tuma retiro, lagando su pais den un buraku profundo. Aktualmente ta trata na trese un solushon di kua un konseho presidensial transitorio konsistiendo di 7 hende, ta mas probabel.

Lo bo kere ku China i Rusia lo a probechá di e situashon débil di Haiti. Pero Rusia tin su mannan yen ku Ukraina, Siria, Kazakhstan, i otronan. Haiti no ta rekonosé China diplomátikamente, pero e tin enemigu di China, Taiwan, komo aliado. China no tin apetit pa yuda Haiti.

E pregunta ta si e konseho presidensial transitorio lo funshoná. E lo por
bai di akuerdo ku un kandidato pa promé minister? E lo por konta ku konfiansa
di pueblo? E lo bai di akuerdo pa bin ku forsanan di seguridat internashonal? E
por garantisá un elekshon demokrátiko den futuro serkano?

Otro batata kayente ta kiko mester hasi ku e gèngnan. Mester invitá nan na
mesa di negosashon manera tabata e kaso ku movementunan manera FARC na Colombia? Pero e gèngnan Hatiano no tin agènda polítiko i nan ta sirbi solamente nan interesnan. Pues kiko bo ta gana ku negoshá ku nan?

Haiti ta puntra su mes te kon leu e mester konfia yudansa di afó pasombra
semper yudansa i intervenshon a laga e pais mas pober, mas instabil, mas
korupto i ménos demokrátiko. Ta parse ku kada biaha ku ayudo internashonal bai Haiti, ta un disaster ta keda kreá pasombra e intentonan aki nunka tabata tin “ownership” di Haiti. Esnan ku ta buska un solushon pa e isla di mas pober den nos hemisferio mester bin mesa ku humildat i konosementu históriko si nan ke proponé kontestanan apropiá.

Alex Rosaria ta miembro di e think tank Caribbean Policy

Fuente: Ms. J. Lumarque, Université Quisqueya