Ponementu di bòshi di dekorashon di fin di aña rondó di e estatua di Pedro Luis Brion riba nos plenchi nashonal ta un bagmunderia di marka mayó. Danki na Clarson Gomez ku a publiká foto di e bochincha aki riba su muraya di Facebook. Superlativo no ta sufisiente pa splika e asko ku esaki a kousa serka mi i hopi hende. No por trata un éroe di e forma aki. Pa esnan ku a puntra “Kiko Brion a hasi?” manera ku ta trata di un ken-ku-ta, lo siguiente.
Pedro Luis Brion a nase riba 6 yüli, 1782 den Otrobanda. Brion durante su estadia na Ulanda komo studiante a lucha kontra di Ruso i Inglesnan ku a forma un menasa pa Ulanda. Aki na Kòrsou e tabata instrumental den derotá e Inglesnan invador. E a sigui lucha asta ora e Komandante Ulandes Schwartsz a bati retirada. Na Aruba tambe e a kore ku e Inglesnan. Legendario ta su kontribushon den e lucha pa libertat di paisnan Bolivariano di Sur Amérika. Pedro Luis Brion no solamente ta un éroe di Kòrsou, pero un suidadano di mundu ku a lucha kontra di opresornan tur kaminda ku e tabata por. E a muri na Kòrsou riba 27 sèptèmber 1821.
Na 1921, selebrando un siglo di su morto, a inougurá Plenchi Brion i a pone un plachi di marmer na su onor i despues un busto. Na 1950 a pone un estatua (ku awe ta na Museo di Kòrsou) remplasando e busto i despues, na 1956 a pone e estatua aktual. Na 2021 nos ta selebrá un siglo di Plenchi Brion.
Ta inkreibel ku nos por tin algun ‘barbaar’, sostené pa Gobièrnu, sin noshon di nos historia ku ta destruí esun tiki di ‘nation building’ ku ta asina nesesario. Boso a pone kara di Kòrsou, e legado di Brion na bèrgwensa. Foei! Gobièrnu, asumí bo responsabilidat.
Nepal, 12 novèmber 2017
Alex David Rosaria Blog 