Mi ta kuminsá na e final.
Mr. dr. Moises Frumencio da Costa Gomez (Dòktor) ta muri riba 22 novèmber 1966, mas o ménos 9 or di mainta, di un atake di kurason. E ta muri na su kas mientras e tabata prepará pa un sita serka su dentista i algun reunion polítiko. Segun su hendenan mas yegá, e tabata optimista. Apenas 10 dia promé e a sali for di hospital kaminda e tabata interná for di 4 di òktober 1966 pa un infekshon di pulmon hopi grave i e kier a dediká su atenshon na un seri di malkontentu, kiebro i traishon den e partido ku e a funda na 1948, Partido Nashonal di Pueblo (PNP).
Algun aña pasá riba un 22 novèmber dilanti di e busto di Dòktor na Bottelier, un oradó na okashon di konmemorashon di morto di Dòkter a bisa: “Shonnan, wak e busto mi tras, mira kuantu doló tin den e kara di Dòktor.” Awor, mi no sa si embèrdat e artista Italiano ku a traha e busto konsientemente kier a krea un ekspreshon di sufrimentu den kara di Gomez, pero e oradó tabatin rason.
Dòktor a konosé un seri kontratempu den e di dos parti di su karera polítiko. Riba 15 novèmber 1954 PNP ta gana elekshon di Staten, pero Partido Progresivo Boneriano ta bira lomba p’e ku konsekuensia ku e no por forma un gabinete Antiano i no por firma Statüt ku tabata su kreashon. Tambe durante e mesun aña ei Dòktor a konosé su promé “coup” interno ora abiertamente un grupo liderá pa Sr. Lodowika a kuestioná su maneho di partido. E siguiente “coup’ a bin na 1958 ora un grupo rebelde konsistiendo di Srs. Abbad, Lauffer i Dip a kombensé sufisiente lider di bario pa bah’é komo Presidente di PNP. Djis promé ku vota, Dòktor ku un elokuente diskurso ta logra kombensé e lidernan di bario pa kambia di opinion.
Mi ta duda ku e slanan aki por a prepará Dòktor pa loke a transkurí durante su último lunannan di bida.
Durante di e elekshon di Staten na yüni 1966, e kombibashon di lista PNP/COP (Curaçaose Onafhankelijke Partij) liderá pa Dòktor, ta pèrdè elekshon ku Partido Demokrat. Promé ku esaki nunka PNP a pèrdè elekshon. Tabata un sla duru pa Gomez. Apenas 3 dia despues di e derota, un grupo di rebelde liderá pa miembro di Staten pa PNP, Sr. Torres, ta organisá un “coup” i ta baha Dòktor komo Presidente di partido. E rebeldenan ta kulpa Dòktor pa e derota elektoral. Algun luna anterior, Srs. Evertsz i Jesurun hustamente pa malkontentu ku maneho di Gomez, ta bandoná PNP i lanta Union Reformista Antiyano (URA). Direktiva Torres ta keda instalá riba 11 di yüni 1966. Pa promé biaha den historia di PNP Dòktor no ta Presidente mas. Gomez no ta rekonosé Direktiva Torres.
Despues di yama dos reunion i tres ròndu di votamente, Dòktor ta logra forma su mes direktiva riba 19 yüni 1966. I klaro ku Direktiva Torres no a rekonosé Direktiva da Costa Gomez. Na algun okashon Dòktor a trata na raya esnan konsiderá komo “rebelde”, pero esaki no a logra pa falta di sosten di lidernan di bario.
Durante un reunion riba 18 sèptèmber 1966 Gomez a purba un di tres biaha pa raya e “rebeldenan”. Esaki atrobe ta frakasá. Ademas e reunion ta baha Direktiva Torres i Direktiva da Costa Gomez i ta instalá un “cuerpo di urgencia” bou di liderasgo di Sr. Rodriguez ku e meta pa den un periodo kòrtiku organisá un elekshon pa un direktiva nobo. Riba 25 sèptèmber ta logra instalá un direktiva nobo den kua tantu Torres komo da Costa Gomez ta representá.
Durante e periodo aki a bira dolososamente opvio ku Gomez a pèrdè sosten di Obispado, prinsipalmente na momentu ku e sekretario di Obisbu, dr. Micklinghof, un fiel sostenedó i defensor di Dòktor, ta bandoná Kòrsou.
4 di òktober 1966 Dòktor ta keda interná ku un kaso grave di infekshon pulmunario. Pa un temporada largu e no por a ni risibí bishita. E ta kumpli aña riba 27 òktober den hospital.
E situashon tenso no ta plakia, ni sikiera ku Dòktor den hospital. Sr. Torres ku mientras tantu a lanta fundashon Fondo di Desarollo Social ta keda lansa krítika riba e grupo pro-Gomez. E problema prinsipal segun e grupo kontra Gomez ta akumulashon di poder den partido i prinsipalmente e manera diktatorial ku e tabata atendé ku poder. Riba 9 di novèmber 1966 e “rebeldenan” di grupo Torres ta sali for di PNP i lanta nan Partido Accion Social Progresista.
Remarkabel ta ku Dòktor a lanta PNP na 1948 hustamente pasombra e tabata haña ku den e partido ku e tabata, esta Curaçaosche Roomsch Katolieke Partij, tabata anda di manera masha outoritario. Historia ta ripití pues.
12 di novèmber Dòktor ta sali for di hospital i e siguiente siman e ta reanudá su trabounan. Banda tur e problemanan deskribí aki riba, Dòktor tabata sumamente prekupá ku e elekshon pa Konseho Insular (KI) programá pa promé mitar di 1967. E kombinashon PNP/COP a gana elekshon di KI na 1963 ku 12 asiento i tabata forma Bestuurscollege su so. E Bestuurscollge liderá pa Dòktor te ku 13 sèptèmber 1966 (na momentu ku e a baha komo Diputado pa asina tuma asiento den Staten) tabata sumamente impopular. Dòktor tabata teme pa un pèrdida grandi na 1967 meskos ku tabata e kaso na 1966 (elekshon pa Staten), lokual a bira un realidat tambe. Elekshon di KI na 1967 a mira e asientonan di PNP/COP bai di 12 pa 6. Pero ya e a bai sosegá i no mester a pasa den otro doló.
Willemstad, Kòrsou
Alex David Rosaria Blog 