Petishon na Reina pa muhé i hende pretu no vota pasombra nan ta bobo: ki lès nos por saka?

Un grupo pudiente di hòmber ‘blanku’, a manda un karta pa Reina Wilhelmina na 1938 pa no duna derechi di voto na muhé i hende pretu pasombra nan no tabata madurá intelektualmente pa vota. P’e grupo, diskriminashon tabata hustifiká.

Kiko tabata e motivashon? Nos promé Kiesreglement (1936) a hasi posibel pa promé biaha vota pa 10 (di 15) miembro di Staten na 1937. Hòmber di 25 aña òf mas, ku un entrada mensual f 1,200 òf mas, ku a paga belasting i tabatin 7 aña di Uitgebreid Lager Onderwijs, por a vota. Solamente 2,100 hòmber di un poblashon total di 90,000, a vota na 1937.

Dòktor a bira e bos kontra di e diskriminashon aki. Pero, den hopi sektor, asta su partido, Curaçaose Roomsch Katolieke Partij (CRKP), tabata pensa ku e pueblo lo no ta kla pa e tipo di emansipashon polítiko aki. Apesar di kontratempu, Staten a bai di akuerdo ku algun kambio chikí ku a pèrmití mas hòmber vota.

E firmantenan di e karta ya menshoná, tabata razu ku Staten a aprobá e kambionan den Kiesreglement i ta pidi Reina riba 29 òktober 1938 pa destruí e desishon di Staten. Permití hende bobo vota lo ta peligroso pa demokrasia. Ta rechasá e petishon riba 14 febrüari 1939.

Mi artíkulo no ta simplemente un pida historia. Despues di e lucha pa derechi igual den pasado, lo bo kere ku nos, desendiente di víktimanan di diskriminashon, sigur lo sa pa no diskriminá un minoria basá riba preferensia seksual. Awe e poderoso iglesia i sektanan kristian ta usa plaka brutu pa infuensiá opinion i Fòrti pa ninga e minoria LGBTQ+ derechi humano. Meskos ku 80 aña pasá nan tambe tin un hustifikashon ku nan ta saka foi un buki. Doloroso ta ku meimei di esnan pro-diskriminashon, tin hende ku ta yama nan mes ‘Gomista’.

Awe mayoria ta husga ku tabata robes di lucha kontra derechi igual di muhé i hende pretu firmando un karta 80 aña pasá pa Reina. Awor, tin ku warda 80 aña pa realisá kon hipókrita i robes nos ta awe pa deskriminá i ninga derechi igual pa un i tur?

Colombo, Sri Lanka

Fuente: Archivo Nashonal

Advertisement