Referèndum sin un lei di referèndum ta garantia pa desaster

Figurabo koriendo bo outo riba un kaminda ku hopi bògt, awa ta kai, zeta plamá riba asfalt, pero bo ta primi gas ta bai. Ta riba e ruta ei nos ta ku tur e gritunan pa referèndum siendo ku no tin un lei di referèndum. Tene un refèndum sin un tal lei ta hasi e choke inevitabel.

Pakiko mester di un lei si ya nos a tene referèndum sin un lei spesífiko? Mi ta menshoná tres (3) motibu.

Pasombra ta importante sa kuantu hende tin ku vota pa esaki tin bálides. E mester ta 10%, 30%, òf mas ku 50%? E islanan di BES si tin un lei al respekto. P’esei e referèndum di 2014 na Statia no tabata bálido, pasombra solamente 45% di esnan ku derechi a bai vota. Na Kòrsou no tin klaridat.

Pasombra nos mester sa na ki momento un opshon ta gana, spesialmente si ta trata un kambio konstitushonal. Ku 50,01%? Òf 66.7%? 75%? Mayoria pais tin esaki debidamente determiná. Na Nevis 62% di poblashon a vota pa sali for di federashon di St Kitts and Nevis, pero lei ta bisa ku pa kambio konstitushonal mester di 66.7%.

Tambe ta importante determiná si nos ke pa un referèndum riba kambio konstitushonal ta obligatorio (bindend) òf no-obligatorio. Obligatorio ta nifiká ku polítikonan mester ehekutá e resultado. No-obligatorio kier men ku ta e polítikonan ta disidí si ta ehekutá e deseo di pueblo, òf no.

Nos a yega di tin referèndum kaba. Realmente nos lo ke bolbe purba nos suèrte sin transparensha ku asta a kondusí na hendenan ku a bisa ku e último tabata froudulento? Ta parse ku nos ta preferá grita referèndum pa loko sin sikiera pensa kon legalmente ta e mihó manera pa organisé. Kisas ta esei ta e intenshon. No bin ku regla ya ora ‘nan opshon’ no gana, hasi ko’i shouru i sembra mas divishon.

New York City, USA

Advertisement