Ken bo ta pa disidí ken ta Yu di Kòrsou òf no?

Si Yu di Kòrsou1 (YdK) tabata un nashonalidat, lo a defini’é den nos konstitushon (p.e. nasé na Kòrsou; nasé den ekterior di un òf dos YdK; i naturalisá). Serka nos esaki (ainda) no ta e kaso. Tin hende ku ke imponé nan definishon ku sinembargo ta sembra divishon, asta bou di e grupo ku a nase na Kòrsou i tin algun generashon aki. Mihó lo tabata un definishon basá riba balornan komun ku ta promové nation-building.

Pa nan, si bo koló no ta pretu, òf sufisiente skur, si bo no ta baila tambú, kome giambo, papia papiamentu (sin importá kon malu bo skibié òf masakré) bo no ta YdK òf asta YdK di pura cepa. Pura cepa kiermen “rasecht” i ta un ekspreshon kargá i konsiderá rasista ku a sòru pa página skur den historia i presente.

Kòrsou ta konsistí di hopi rasa, etnisidat, i orígen. E promé habitantenan tabata Indjan prosedente di Sur Amérika, pa despues yega Spañó, Hudiu, Hulandes Oropeo, katibu di Afrika i mas grupo.

Mi antepasadonan a yega Kòrsou na 1795. Awor abo ta bisami ku mi no ta YdK (di pura cepa)? Pasombra mi no ta pretu sufisiente, no ta interesá pa baila tambú, no ta fanátiko di giambo? Pasombra mi gusta músika rock, futbòl Merikano, kome sushi i ta skibi na ingles? Ken bo ta pa kuestionámi i otronan simplemente pasombra nos no ta pas den bo definishon diskriminatorio i rasista?

E tendensia aki pa dividí ‘nan i nos’ ta un eskoho konsiente pa identifiká, inventá karakterístikanan di e.o. komportashon, kultura, rasa pa distingí un grupo for di otro pa finnan makabre. Kòrda kon a usa “nos no ta nan” den kampaña. E eskoho aki (t)a kousa hopi morto rònt mundu i den kasonan ektremo, matansa pa kaba ku sièrto gruponan.

‘Nta mihó definí YdK a base di un sèt di balor komún ku ta promové inklushon, kompashon i kapasidat pa stima nos pais inkondishonalmente?

Willemstad, Kòrsou

1Mi ta usa Yu di Kòrsou pasombra esaki ta den nos himno

Advertisement

Author: alexdavidrosaria

Alex Rosaria is from Curaçao. He has a MBA from University of Iowa. He was Member of Parliament, Minister of Economic Affairs, State Secretary of Finance and United Nations Development Programme Officer in Africa and Central America. He is an independent consultant active in Asia and the Pacific.

18 thoughts on “Ken bo ta pa disidí ken ta Yu di Kòrsou òf no?”

  1. Bon bisá suidadano. Ami tambe a pompa, mi tambe gusta sushi i mi no ta balia tambu. Dios laga no bisa mi no ta YDK pasobra mi ta Yankees. Bon siman!!

    Like

  2. Ekselente artíkulo!
    Bisa ku boka bo ta yu di Kòrsou i aktua manera un yu di Kòrsou ta dos kos diferente. Hopi ku no a nase na Kòrsou tin mas amor pe pais ku diferente ku ta bati riba pechu tur dia pa konbensé nan mes ku nan ta yu di Kòrsou.

    Like

  3. Komo dobel siudadano (Hulandes/Merikano) i TAMBE yu di Korsou, ta di lamenta ku bosnan ta fanatiko di Yankees i no di e tim ku tin berdadero KURASON! 😉

    Like

  4. Mérka USA tin 100 i piku tribu indjan, i 1000 i 1 imigrante, nan no ta “yu di Mérka” pero Mérikano. “Make America great again”, “awor ta pueblo su bùrt” ta propaganda politika.

    Like

    1. Nan NO ta Merikano. Ofishalmente nan ta Citizen of the United States. Pues tin un diferensia entre kiko ta legal/konstitushonal i loke hende ta usa den lenguahe diario. Den e artíkulo mi a pone den e promé frase dikon mi a usa YdK. Mi no a drenta den e diskushon YdK v. Kurasoleño ku pa e artíkulo aki no ta relevante.

      Like

  5. Bon tardi Baluarte Edifikadó Mayó di Kòrsou Alex David Rosaria MBA,

    Danki p’e artíkulo aki. E tabata interesante pa lesa í na mes momentu preokupante.

    Den e dokumento “Plan di Maneho i Akshon di Kultura di Kòrsou … Rumbo pa Independensia Mental (Baluarte Edifikadó Mayó di Kòrsou mr. dr. René V. Rosalia desèmber 2001)” e asina yama Yu-di-Kòrsou ta identifiká í referí na dj’e komo:

    “Yu-di-Kòrsou
    E yu-di-Kòrsou ku ta referí n’e den e plan di maneho akí ta korespondé ku sierto karakterístika. Yu-di-Kòrsou ta esun ku ta biba na Kòrsou òf pafó di Kòrsou i ku ta kumpli ku e siguiente kriterionan. E ta papia i komprondé Papiamentu. E ta dispuesto na traha pa adelanto di Kòrsou. E por deklará enfrente di mundu ku e ta yu-di-Kòrsou i ta aseptá su kultura i historia sin niun klase di bèrgwensa. E ta aseptá i biba ku e situashon multikultural di Kòrsou i ta aseptá diversidat kultural. E no ta konsiderá elementunan kultural di su grupo ètniko komo e kultura di Kòrsou pero komo parti di kultura di Kòrsou. E ta aseptá ku elementunan afro-kurasoleño ta dominá mayoria parti di kultura di Kòrsou.” (Página 10)

    Like

    1. Pa loke ta e parti preokupante ta e alinea siguiente:

      “Pa nan, si bo koló no ta pretu, òf sufisiente skur, si bo no ta baila tambú, kome giambo, papia papiamentu (sin importá kon malu bo skibié òf masakré) bo no ta YdK òf asta YdK di pura cepa. Pura cepa kiermen “rasecht” i ta un ekspreshon kargá i konsiderá rasista ku a sòru pa página skur den historia i presente.”

      Banda di e hecho ku ta 1 (UN) Rasa Humano so ta eksistente, e uso di rasa den e artíkulo ta parse di ta un uso liber í di reemplaso di e konseptonan sosial di “etnisidat” í “tribalismo” ku ta un di e faktornan ku ta stanká e proseso di Edifikashon di Nashon í E Noshon di Un Pueblo ku ta selebrá í rekonosé su diveraidat í oportunidatnan ku esaki por nifiká pa Kòrsou.

      Like

  6. Hopi bon artikulo, Alex Rosario.

    Kòrsou semper tabata un isla multikultural. No ta eksisti un Yu’i di Kòrsou puro cepa, paso nos tur ta konsistí di diferente rasa i etnisidat.

    Lamentablemente, e situashon polítíko aktual ta basta kaótiko. Hopi hende ta usa e dolor ku ta biba den e pueblo, pa krea konfushon i difishon, ku e meta pa bira líder polítíko. Pesei nan ta usa Identity Politics, pa asina logra nan meta personal i material.

    Nos nashonalidat ta Hulandes i na Kòrsou nos ta papia diferente idioma. Papiamentu no ta uniko idioma ofishal, pero e idioma ku gran parti di Yu’i Kòrsou ta papia. Pa bisa ku un Yu’i Kòrsou mester ta di sierto koló, ta algu hopi rasista.

    Bon artíkulo.

    Like

  7. YDK mester ta of bira un konsepto mental I asta promoshonal den sierto sentido. Algun dia pasa tabatin reakshon riba e echo ku a duna un hulandes europeo e boton di Bon Yu di Korsou….ounke mi ta di akuerdo ku a base di e kantidat di anja ku e ta biba na Korsou e mester por bisa maske ta SI of NO na papiamento, ela duna kontribushon positivo komo miembro aktivo di Korsou….esey ta konta.

    Like

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

%d bloggers like this: