Na momentu ku un barku di peska Ruso a bandoná nos haf 40 aña pasá, ningun hende por a premirá ku esaki lo a resultá den un operashon polisial grandi.
Barkunan Ruso ku ta piska den awanan internashonal pafó di e kontinente Suramérikano regularmente tabata bin Kòrsou pa bùnker. Pues presensia di un barku di peska Ruso e tempu ei, no tabata straño. Na momentu e barku Ruso en kuestion kier a bandoná Kòrsou, manera ta rutina, a manda un lots pa gui’é for di waf di KNSM. Pero, poko despues ku e lots a subi abordo, e ta mèldu kantor ku no ta responsabel p’e kontinuá pasombra e tripulashon tabata mal fuma. Outoridatnan portuario ta manda un otro lots ku tambe ta ninga hasi e trabou ora e mira e situashon na bordo. Ta disidí manda nos mihó lots ku si ta saka e barku sin insidente.
E historia naturalmente no a kaba. E barku Ruso a sali haf kue direkshon di laman grandi, pero nos lots no tin fin di baha fo’i e barku Ruso i subi e boto di lots pa bin aden. Kapitan di e barku di lots ta bati alarma ku a sekuestrá nos lots. E notisia aki ta yega serka Gezaghebber ku despues di konsultá ku Fòrti ta manda tres boto yená ku polis bon armá tras di e Rusonan.
Ora polis logra subi e barku Ruso ta nota ku nos lots no tabata sekuestrá sino totalmente bou di su awa, igual na e tripulashon. E no por a ni baha e trapi di kabuya i mester a mar’é na un kabuya i ‘fir’é’ den un di e botonan ku polis.
Gezaghebber, furioso ta primintí un investigashon ‘profundo’. Kantor di Haf sinembargo ta deklará: “No ta nada straño, ku un loods ta dal bitter, ora e guia un barcu. Bo mester corda ku e hendenan aki ta guynan di laman. E olanan ta pone cu nan ta haña gana di dal un drinks “ (Nobo, 4 desèmber 1982).
Willemstad, Kòrsou
Alex David Rosaria Blog 