A tumba avion ku Kevin Jesurun 7 aña pasá

Kevin (te na man drechi) durante fiesta di independensia di Jamaica na 2010 na Montaña

Awe ta shete aña ku Kevin Jesurun a muri ora su avion a keda alkansá pa un rakèt riba Ukraina. Mi ta reprodusí un artíkulo ku mi a skibi 2 aña pasá.

Yüni 2010, Kim Kevin Jesurun a traha un sita ku mi na restourant Golden Star pa papia di su ambishonnan polítiko. No tabata un sorpresa pasombra semper mi tabata mira Kevin presente ku su kámara, sintá na un kaminda stratégiko den sala, pa e filma kualkier aktividat tokante mr. dr. Moises da Costa Gomez (Dòktor). Dòktor tabata su éroe polítiko. E mester a haña esaki di su tata, Tula Jesurun, ku e.o. a sòru pa e estatua di Dòktor riba Gomezplein. Un dia mi tabatin gana di wak bèk un diskurso ku mi a tira tokante Dòktor. Mi a bèl Kevin p’e grabashon en kuestion. Pa mi sorpresa Kevin a bisa ku e tin mas ku 100 kasèt grabá pero nunka e ta pone riba e kasèt kiko tin grabá. Kevin a bira konosí pa mi komo un hende ku “whatever he did, he did it his way”.

Bèk na e kombersashon na Golden Star, Kevin su motivashon mayó pa drenta polítika tabata e manera ku nos ta maltratá bestia riba nos isla. Tambe e a insistí ku e ke number 11 riba lista. Su motibu? E tabatin su lema kaba: “Jesurun t’esun riba diesun”. Kevin a haña nr. 11. E a risibí 12 voto. Sinembargo e a soña pa haña 11 voto.

Pa 2012 e a bandoná polítika i a dediká su bida na biaha, prinsipalmente Asia. Su último buelo tabata di Amsterdam pa Kuala Lumpur ku Malaysia Airlines buelo # 17 riba 17 yüli 2014. Un rakèt intenshonalmente lansá a eksplotá e avion riba teritorio di Ukraina matando tur pasahero i tripulante. E tabata e úniko Yu di Kòrsou na bordo.

Su prekupashon pa ku animal semper a keda bibu. Nos último kòmbersashon telefóniko tabata hustamente tokante di e konsepto di lei ku mi tabata prepará ku mas hende na fabor di bienestar di animal. Mi a proponé na 2016 pa dediká e lei na Kevin Jesurun lokual aparentemente un Parlamentario aktual ta sostené. Ta di spera ku pronto e lei keda tratá.

Mayan ta 5 aña ku Kevin Jesurun a keda ranká for di nos. Forsa na su famia i amigunan rònt mundu.

Wilemstad, Kòrsou

Advertisement