Awe, mas leu fo’i kas

Bakunashon kontra COVID ta e manera mas efektivo pa no keda kontagiá, bai hòspital i muri prematuramente. Mas hende bakuná, ménos e posibilidat pa COVID adaptá, manera e kaso di variashon Delta, i bira mas peligroso. Esaki ta loke a keda pruebá pa komunidat mundial sientífiko i médiko. Na Kòrsou awe 93+% di esnan den hòspital pa COVID no ta (full) bakuná

Esnan ku ta kampañá ku bakunashon ta un eskoho, tin rason. E t’un eskoho. Loke mester añadí ta ku tur eskoho tin konsekuensia. I esnan kontra bakunashon nunka ta papia di esei, bo’n ripará?

Mas hende keda sin bakuná mas grandi e chèns pa ‘lockdown’, kontrakshon ekonómiko i desempleo. Kisas bo libertat pa skohe bakunashon ta mas importante ku libertat di tur hende pa move? E por ta mas importante ku seramentu di negoshinan i ménos pan riba mesa?

Mi a skohe pa bakunashon pa protehá mi mes, mi sernan kerí i próhimo. Mi eskoho ta baha preshon riba gastunan i personal di salú públiko, i yuda trese normalidat den ekonomia i nos bida diario.

Bo eskoho pa no-bakuná ta pone no solamente abo pero nos tur den mas peliger. Mester start e kòmbersashon kon ta pone esnan ku no ke bakuná karga ku e konsekuensianan ku nan ta imponé riba nos tur.

Willemstad, Kòrsou