Infantil i sin konsiderashon

Nos minister Presidènt i ‘Bartender-in-Chief’ resientemente tabata sirbi beter na apertura di un establesimentu komersial sin un tapa boka ni distanshamentu físiko, ámbos regla di su mes kabinete. Awor, bèrdat ku polítikonan gusta sali riba potrèt òf video sin pensa riba konsekuenshanan pasombra popularidat i voto ta mas importante. Pero, un minister Presidènt mester ta konsiente di e mensahe ku e ta manda ku su akshonnan? Klaro. Nos ta mei-mei di un krísis di COVID. CMC a bati bèl pasombra pronto e no por kumpli ku su tareanan. Awor’ki ta totalmente inoportuno pa akshonnan infantil.

E mensahe ku nos ‘Bartender-in-Chief’ a manda ta ku den e krísis aki medidanan pa evitá kontagio no ta importante. Esaki despues ku su minister di Salubridat a preferá skonde tras di privasidat enbes di na un manera transparente bisa ku bakuna ta e mihó opshon pa protekshon kontra di COVID i mas desaster sosioekonómiko.

Mientras tantu e otro partner di koalishon ta ketu i ta komplisé di e komportashonnan estúpido i sin konsiderashon aki di dos miembro di gabinete.

E Presidente di Konseho di Minister mester sali oferesé su diskulpa.

Willemstad, Kòrsou